„Að fá að leiða saman þrjár efnilegar listakonur samtímans til móts við tvo liðna listamenn, sem eru meðal merkustu listamanna er Vestmannaeyjar hafa alið af sér og  varpa í sýningunni upp spurningunni um hvar við eigum heima, með verkum sem spanna næstum 100 ára tímabil, þykir mér verðugt og áhugavert verkefni,“ segir Vala Pálsdóttir sýningarstjóri sýningarinnar Ertu héðan? sem var opnuð í KFUM&K húsinu í Vestmannaeyjum á laugardaginn.

Kveikjan að sýningunni eru ævi og störf Júlíönu Sveinsdóttur myndlistarkonu sem fædd er í Vestmannaeyjum. Sýningin veltir því upp hvernig umhverfið mótar okkur í tíma og rúmi, og miðar að því að fanga persónulegar upplifanir í fjölbreytileika samfélagsins.

Á sýningunni er að finna verk fimm myndlistarmanna er tengjast Vestmannaeyjum með ólíkum hætti og eiga það sammerkt að hafa horft um öxl og velt áhrifum uppruna síns fyrir sér í listsköpun sinni. Sýningarstjóri er Vala Pálsdóttir, meistaranemi í sýningargerð við Listaháskóla Íslands og er sýningin hluti af útskriftarverkefni hennar frá Listaháskóla Íslands. 

Eins og sést á myndunum var gleðin við völd þegar sýningin var opnuð.