Það var einstök stemning í Borgarleikhúsinu þegar Fyrrverandi var frumsýnt. Verkið er eftir Val Frey Einarsson en hann leikstýrir einnig sýningunni en eiginkona hans, Ilmur Stefánsdóttir myndlistarmaður sér um leikmyndina. Tónlistarmaðurinn Davíð Þór Jónsson er innanborðs í sýningunni og töfrar fram einstaka tónlist.
Hvernig eru sambönd, samlíf, draumar, áföll og samskiptin við tengdó? Hvernig eru samskiptin við stjúpbörnin og fyrrverandi? Hversu oft hugsarðu um fyrrverandi? Er eðlilegt að stjúpsystkini klóri augun úr hvoru öðru? Hvað eru eiginlega margir í þessu hjónabandi? Er hundurinn ekki óeðlilega ástleitinn? Hver var að tala um opið samband?
Allt þetta kemur fyrir í verkinu Fyrrverandi og er útkoman einstaklega sniðug og skemmtileg. Smartland hefur heimildir fyrir því að fólk sem á það til að dotta í leikhúsi hafi náð að halda sér glaðvakandi á þessari sýningu því hún er svo grátbrosleg og fyndin.