Árni Samúelsson forstjóri Sambíóanna varð áttræður þriðjudaginn 12. júlí og hélt hann upp á afmæli sitt í Perlunni í faðmi fjölskyldu og vina ásamt óvæntum leynigesti sem brá sér á kreik í veislunni og hreif gesti með sér í söng og dansi. 

Árni, einnig sem þekktur sem Bíókóngur Íslands bylti bíómenningu landsins þegar hann opnaði Bíóhöllina í Álfabakka árið 1982 en áður hafði hann átt og rekið Kvikmyndahúsið í Keflavík. Síðan þá hefur kappinn opnað kvikmyndahús í Kringlunni, Egilshöll og á Akureyri. Ferill Árna sem brautryðjandi á sínu sviði spannar nú yfir heil 50 ár.

Það var vel við hæfi að leynigesturinn, Stefán Helgi kennari við Víðistaðaskóla og fremsta Elvis-eftirherma landsins, mætti og tók lagið fyrir afmælisbarnið. Á dögunum var stórmyndin Elvis frumsýnd í kvikmyndahúsum landsins og hefur myndin slegið rækilega í gegn hér heima sem og um heim allan. Þá hafa um 20.000 manns séð Elvis í bíó hér á landi og er myndin enn þann dag í dag ein vinsælasta kvikmynd landsins en hún var frumsýnd þann 22. júní s.l.

Árni lét sig að sjálfsögðu ekki vanta á sérstaka forsýningu Elvis í Egilshöll í síðasta mánuði og fannst honum myndin alveg hreint út sagt frábær.