Á annað hundrað gestir mættu í opnunarteiti hjá Lava Show á dögunum. Hraun rann í stríðum straumum í glæsilegum sýningarsal lifandi hraunsýningarinnar Lava Show að Fiskislóð 73 úti á Granda.

Er þetta í fyrsta sinn í nær 5000 ár sem hraun rennur í Reykjavík eða allt frá því að Elliðaárdalshraun myndaðist fyrir 4800 árum. Talið er að Elliðaárdalshraun hafi runnið úr Brennisteinsfjöllum á sínum tíma en hraunið, og svæðið þar í kring, er í dag ein vinsælasta útivistarperla höfuðborgarsvæðisins. Nú rennur hraunið hins vegar í öruggu rými inni sýningarsal Lava Show á Granda.

Á sýningu Lava Show er hraun brætt upp í 1100°C og hellt inn í sýningarsal fullan af fólki. Fyllsta öryggis er gætt og því má segja að þetta sé eini staður veraldar þar sem hægt er að upplifa rauðglóandi hraun með öruggum hætti.

Mikið er lagt upp úr fræðslu og persónulegri upplifun og í lok sýningar gefst gestum færi á að spyrja sýningarstjórann spurninga. Hjónin Júlíus Ingi Jónsson og Ragnhildur Ágústsdóttir eru stofnendur Lava Show og eru í skýjunum með opnun Lava Show í Reykjavík.