Hildur Hermóðsdóttir, stofnandi bókaútgáfunnar Sölku, ætlaði að setjast í helgan stein þegar hún seldi útgáfuna. Hún hefur þó ekki getað setið auðum höndum því á dögunum kom út bókin Ástin á Laxá. Útgáfu bókarinnar var fagnað hjá Sölku og var vel mætt í útgáfuteitið hjá Hildi.

Ástin á Laxá - Hermóður í Árnesi og átökin miklu er sagan af því þegar Þingeyingar tóku til sinna ráða til verndar náttúrunni og sprengdu stíflu í Laxá með dýnamíti í eigu virkjunarinnar. Einnig er sögð saga Hermóðs í Árnesi og af hans þætti í baráttunni miklu fyrir verndun Laxár og Mývatns. Bókin fangar ástina á náttúrunni og bregður upp myndum af fólkinu sem verndaði hana með samheldni og eldmóð að vopni.