Söngkonan og lagahöfundurinn Hildur Kristín Stefánsdóttir og Kjartan Trauner létu sig ekki vanta í afmæli Rammagerðarinnar.
Hönnuðir og fagurkerar mættu í Hörpu á laugardaginn til að fagna eins árs afmæli verslunarinnar í Hörpu. Fjöldi hönnuða kynnti vörur sínar fyrir gestum og gangandi, meðal annars Andrea Maack, Lilja Birgisdóttir, Bergþóra Guðnadóttir, Hilda Gunnarsdóttir og margir fleiri.
Rammagerðin hélt veglegt hönnunarhappdrætti af þessu tilefni og Berglind Festival, sem er einmitt rödd Rammagerðarinnar í útvarpsauglýsingum, dró út vinninga við mikinn fögnuð. Rammagerðin hefur tekið stakkaskiptum undanfarin ár og í stað fjöldaframleiddra túristavara er hún orðin heimili íslenskrar hönnunar.