Það var hátíðleg stemning við Regent Street í Lundúnum þegar íslenska útivistarmerkið 66°Norður fagnaði opnun á flaggskipsverslun sinni við þessa þekktu verslunargötu. Um 450 manns lögðu leið sína í teitið en þar á meðal voru fjölmörg þekkt andlit, bæði á íslenska vísu og á heimsvísu. 

Knattspyrnumaðurinn og fyrirsætan Rúrik Gíslason lét sig ekki vanta og heldur ekki fótboltamaðurinn Grétar Rafn Steinsson. Þar voru líka Guðni Bergsson, Sturla Sigurjónsson sendiherra Íslands í Lundúnum, Liv Bergþórsdóttir forstjóri Bioeffect og Lilja Dögg Einarsdóttir bankastjóri Landsbankans. 

Börn Liams Gallaghers úr hljómsveitinni Oasis létu sig ekki vanta en þau heita Lennon, Molly og Gene. Þar var líka Susan Bender frá tískutímaritinu Vogue og útivistarljósmyndarinn Chris Burkard. Knattspyrnumaðurinn Nat Phillips var þá á svæðinu og prinsessan Beatrice. 

Arkitektastofan Gonzalez Haase hannaði verslunina sem er 330 fm að stærð. Stofan sótti innblástur í íslenska náttúru en þar má sjá rauðbleikt teppi sem er vísun í Rauðhóla en þar er líka að finna íslenska útilykt sem 66°Norður og Fischersund hönnuðu saman. Búið er að tappa íslensku útilyktinni á flöskur og því hægt að úða henni þegar stórborgarlykt Lundúnaborgar verður of mikil. 

66°Norður opnaði sína fyrstu verslun í Kaupmannahöfn árið 2014 og rekur fyrirtækið nú tvær verslanir í borginni. Fyrr í haust opnaði fyrirtækið pop-up-verslun í Soho sem var opin í 66 daga á meðan undirbúningur var í fullum gangi í húsnæðinu á Regent Street. Þá hóf 66°Norður einnig sölu á fatnaði sínum í verslunum END Clothing í Bretlandi í síðustu viku.

„Við erum virkilega stolt af þessari verslun og að geta miðlað vörumerkinu og sögu þess með einstökum hætti þegar kemur að búðarupplifun til nýrra viðskiptavina hér í Bretlandi. London er stærsta sviðið í smásölu á fatnaði og þetta er stórt skref fyrir fyrirtækið og mikil fjárfesting. Við vorum búin að rannsaka markaðinn vel og sjáum bæði á þeim niðurstöðum og vefverslun okkar að Bretar eru mjög móttækilegir fyrir vörumerkinu. Fyrsti dagurinn fer mjög vel af stað í sölu og erum við mjög spennt fyrir komandi vikum í jólaversluninni í London,“ segir Helgi Rúnar Óskarsson, forstjóri 66°Norður.