Það var einstök stemning á Hótel Reykjavík Grand þegar viðurkenningarhátíð FKA fór fram. Ásta S. Fjeldsted, Dr. Guðfinna Sesselja Bjarnadóttir og Grace Achieng voru heiðraðar. 

Áslaug Arna Sigurbjörnsdóttir Háskóla-, iðnaðar- og nýsköpunarráðherra flutti erindi og fagnaði með félagsmönnum FKA. Ásta S. Fjeldsted hlaut FKA viðurkenningu 2023 sem veitt er fyrir vel unnin störf í þágu atvinnureksturs kvenna eða þeim sem hafa verið og er konum í atvinnulífinu sérstök hvatning eða fyrirmynd en hún er forstjóri Festar. Dr. Guðfinna Sesselja Bjarnadóttir hlaut Þakkarviðurkenningu FKA 2023 sem er veitt konu fyrir eftirtektarvert ævistarf stjórnanda í atvinnulífinu. Grace Achieng hlaut Hvatningarviðurkenningu FKA 2023 sem er veitt konu í atvinnulífinu fyrir athyglisvert frumkvæði.

Í dómnefnd fyrir viðurkenninguna voru Árni Sigfússon, fyrrverandi borgarstjóri Reykjavíkur og bæjarstjóri Reykjanesbæjar, Chanel Björk Sturludóttir, dagskrárgerðarkona og meðstofnandi félagasamtakanna „Hennar rödd“, Kathryn Gunnarsson stofnandi og framkvæmdastjóri Geko Consulting, Logi Pedro Stefánsson, listamaður og meðeigandi 101 Productions, Magnús Harðarson, forstjóri Kauphallarinnar, Margrét Guðmundsdóttir, stjórnarmaður og fyrrverandi forstjóri Icepharma.  Stjórnarkona FKA, Guðrún Gunnarsdóttir deildarstjóri Fastus var formaður dómnefndar.

Andrea Róbertsdóttir framkvæmdastjóri FKA var kynnir á hátíðinni og Sigríður Hrund Pétursdóttir formaður FKA og Guðrún Gunnarsdóttir formaður dómnefndar kynntu FKA viðurkenningarhafa á svið ásamt stjórnarkonum félagsins þeim Unni Elvu Arnardóttur varaformanni FKA, Dóru Eyland ritara FKA, Katrínu Kristjönu Hjartardóttur gjaldkera FKA, Sigrúnu Jenný Barðadóttur og Írisi Ósk Ólafsdóttur.