Það var einstök stemning í Þjóðleikhúsinu þegar stykkið Ex var frumsýnt. Um er að ræða flugbeitt sálfræðidrama og annað verkið í splunkunýjum þríleik Mariusar von Mayenburg sem verðlaunaleikstjórinn Benedict Andrews leikstýrir. Verkin í þríleiknum, Ellen B., Ex og Ekkert mál, eru sjálfstæð, en ákveðin þemu og eiginleikar tengja þau.

Á fallegu heimili fyrirmyndarhjóna, arkítekts og læknis með tvö ung börn er bankað upp á um miðja nótt. Fyrir utan stendur fyrrverandi kærasta eiginmannsins og bráðvantar samastað eftir að hafa flutt út frá sambýlismanni sínum í miklum flýti. Fljótlega breytist heimilið í vígvöll þar sem ásakanir og uppljóstranir þjóta á milli eins og byssukúlur. Hvað dró þetta fólk hvert að öðru í upphafi?

Hjónin Gísli Örn Garðarsson og Nína Dögg Filippusdóttir leika hjónin en Kristín Þóra Haraldsdóttir leikur fyrrverandi kærustuna. 

Verkið hreyfði við fólki sem er ekkert skrýtið. Það vill líklega enginn upplifa það sem borið er á borð í verkinu.