Guðmundur Kristjánsson forstjóri Brims og Helga I. Stefánsdóttir búningahönnuður létu sig ekki vanta á frumsýningu Soviet Barbara sem er saga um Ragnar Kjartansson listamann sem fór til Moskvu og setti þar upp sýningu. Gaukur Úlfarsson leikstýrir myndinni og Hákon Sverrisson stjórnaði kvikmyndatöku. Davíð Berndsen sá um tónlistina og Elísabet Ronaldsdóttir og Sigurður Kristinn Ómarsson klipptu. 

En um hvað fjallar þessi mynd? 

Jú, um listamanninn Ragnar Kjartansson sem fór til Moskvu í lok árs 2020 til þess að setja upp sýningu í menningarmiðstöð í miðborginni. Miðstöðin, GES-2, var áður orkuver sem knúði Kreml, sjálft valdasetur þessa víðfeðmasta ríkis heims. 

Stærsta listaverk Ragnars á sýningunni var lifandi skúlptúr þar sem hópur 70 listamanna, leikara og tæknifólks, lék, tók upp og framleiddi einn þátt á dag af bandarísku sápuóperunni Santa Barbara á rússnesku. Í Soviet Barbara er fylgst með aðdraganda, opnun og eftirmála þessa sérstæða ævintýris sem hlaut skjótan endi þegar Rússar réðust inn í Úkraínu. 

Soviet Barbara var frumsýnd á heimildarmyndahátíðinni HotDocs í Toronto fyrr á árinu og hlaut í kjölfarið dómnefndarverðlaun á kvikmyndahátíðinni Skjaldborg á Patreksfirði. Næst heldur myndin svo á Nordisk Panorama eftir frumsýningu í Bíó Paradís sem fram fór í gær. Gaukur Úlfarsson, Guðrún Olsen, Guðni Tómasson, Freyr Árnason og Kristín Ólafsdóttir framleiddu myndina.