Á dögunum fagnaði Dans & jóga Hjartastöðin 30 ára afmæli. Það var slegið upp veislu í tilefni stórafmælisins og margir af mestu stuðboltum landsins mættu til að skemmta sér og öðrum.  Rokkkóngurinn Sæmi Rokk lét sig ekki vanta, tónlistarmaðurinn Jón Jónsson hélt uppi stuðinu og leikarinn Jóhann G. Jóhannson var veislustjóri í afmælinu. 

Danskennarinn Jóhann Örn Ólafsson, betur þekktur sem Jói, stofnaði dansskólann Danssmiðjuna haustið 1993. Jóhann bauð upp á danskennslu í samkvæmisdönsum fyrir börn og fullorðna og nokkrum árum seinna bættist línudans við. Samhliða kennslunni voru settar upp ótal danssýningar um land allt og keppnisdansarar á vegum skólans unnu til fjölda verðlauna. Um aldamótin kom Theódóra Sæmundsdóttir inn í starfið og kenndi dans með Jóa en árið 2009 gerðist Thea, eins og Theódóra er kölluð, jógakennari og nafni Danssmiðjunnar var breytt í Dans & Jóga. Hjartastöðin varð viðbót við nafnið til að leggja áherslu á að allt er gert með hjartanu, hjartastöð nemenda og þátttakenda er styrkt með hreyfingunni og allir eru hjartanlega velkomnir.