Það mátti sjá mörg þekkt andlit á frumsýningu heimildamyndarinnar Purrkur Pilnikk: Sofandi, vakandi, lifandi, dauður í Bíó Paradís. 

Meðal gesta voru Andrea Jónsdóttir, sem oft er titluð „rokk-amma Íslands“, útvarpsmaðurinn Ólafur Páll Gunnarsson og kærasta hans, Hrafnhildur Theódórsdóttir, og Sigtryggur Baldursson tónlistarmaður. Þar var líka Tómas Sturluson annar höfundur myndarinnar. 

Hljómsveitin Purrkur Pillnikk kom eins og stormsveipur inn í íslenska tónlistarheiminn í byrjun níunda áratugar 20. aldar. Liðsmenn sveitarinnar, Ásgeir Bragason heitinn, Bragi Ólafsson, Einar Örn Benediktsson og Friðrik Erlingsson umturnuðu tónlistarsenunni með hráum og ágengum hljómi sem einkenndi pönktónlist.

Sveitin var aðeins starfrækt í tæp tvö ár en á þeim tíma tókst henni að gefa út fjórar plötur og spila á tugum tónleika víðs vegar um landið. 

Heimildamyndin gefur innsýn í það sem gerðist á bak við tjöldin og sýnir einnig frá endurkomu sveitarinnar. Liðsmenn Purrks komu saman á síðasta ári til að taka upp fjörutíu ára gamlan óútgefin söngvasveig, Orð fyrir dauða.