Menningar og viðskiptaráðuneytið stóð fyrir opnu málþingi um framlag menningar og skapandi greina til verðmætasköpunar á Íslandi.

Umboðsmaðurinn Jasper Parrott flutti erindi um mikilvægi listar á víðsjárverðum tímum og viðraði hugmyndir um að Ísland gæti orðið fullkominn staður fyrir alþjóðlega miðstöð listar og friðar. Parrott var umboðsmaður píanóleikarans Vladimir Ashkenazyen og er í dag umboðsmaður píanóleikarans Víkings Heiðars og Daníels Bjarnasonar tónskálds. 

Parrott benti á að landfræðileg lega landsins og herleysi gæti nýst vel fyrir þessa miðstöð og minnti gesti á leiðtogafundinn sem haldinn var hérlendis árið 1986. Sagði hann Ísland vera fullkominn vettvang fyrir áhrifafólk til að hittast og setja áherslu á hvernig stuðla megi að listsköpun og frið í heiminum, því listin dafni jú best í friði eins og allt mannkynið. Gestir tóku hugmyndafræði Parrotts vel og hlaut hann dynjandi lófatak að launum.

Skýrsla Ágústs Ólafs 

Ágúst Ólafur Ágústsson hagfræðingur kynnti skýrslu sem greinir stöðu menningar og skapandi greina hérlendis. 

„Tilgangur með þessari vinnu var að fá samanburðarhæfar tölur og skilgreina tækifæri,“ segir Ágúst Ólafur og bendir á að beint framlag til menningar og skapandi greina hafi numið 3,5% af landsframleiðslu árið 2023 eða 150 milljörðum sem er litlu minna en framlag fiskveiða og fiskeldis til þjóðarbúsins sama ár eða 4%.

Á málþinginu var fluttur fjöldi erinda, meðal annars um mikilvægi þekkingarsköpunar og gagnaöflunar, almannaheillafélög í heimi menningar og listar, virði og virðismat í skapandi greinum auk þess sem hugmyndir og eldmóður gesta í pallborðsumræðum veitti kröftugan innblástur.