Andrés Magnússon, blaðamaður og fulltrúi ritstjóra Morgunblaðsins, varð 60 ára hinn 28. apríl. Hann og Margrét Júlíana Sigurðardóttir eiginkona hans fögnuðu afmælinu í gær með síðdegisteiti í Fantasíu, veislusal á Vinnustofu Kjarval í Austurstræti með útsýni yfir vorblíðuna á Austurvelli. Vel var mætt í afmælið, sem er ekki skrýtið, því Andrés er vinur vina sinna og hefur komið víða við í leik og starfi. 

Andrés er innmúraður hægri maður en hann á þó vini úr öllum flokkum og í raun úr öllum kimum samfélagsins. Nokkrir af þessum vinum Andrésar söfnuðu saman í gjöf og þegar hópurinn var að velta fyrir sér hvað ætti að gefa þessum 60 ára gamla manni þá var því hvíslað að hópnum að hann vildi helst eitthvað lítið og dýrt. Það eru orð sem móðir Andrésar, Áslaug Ragnars heitin, lét falla eitt sinn þegar hún var spurð að því hvað hún vildi í afmælisgjöf. 

Til þess að uppfylla óskir afmælisbarnsins um að fá eitthvað lítið og dýrt í afmælisgjöf, var keypt dýrasta koníaksflaska sem fáanleg er á Íslandi. Flaskan á að endast út lífið og var lagt upp með að hann mætti bara dreypa á henni einu sinni á ári, á sjálfan afmælisdaginn. Þess má svona geta til gamans að bæði Bjarni Benediktsson fyrrverandi formaður Sjálfstæðisflokksins og Össur Skarphéðinsson fyrrverandi formaður Samfylkingarinnar voru með undirritaðri í gjöfinni ásamt fleira góðu fólki.