Kvennalandsliðið í knattspyrnu leikur í lokakeppni EM í sumar. Ný treyja var kynnt til leiks á dögunum en íþróttamerkið Puma framleiðir sérstakar treyjur sem liðið mun spila í, í stað hefðbundinna varabúninga á mótinu í sumar.

Treyjan er sérhönnuð fyrir íslenska landsliðið og er innblásturinn sóttur í hreyfingar norðurljósanna og flæði jökuláa landsins. Treyjurnar eru að nær öllu leyti úr endurunnu hráefni. 

Treyjan er hvít í grunninn með ljósbleikum- og bláum þverröndum. 

Í tilefni af frumsýningu treyjunnar var blásið til veislu í höfuðstöðvum Landsbankans. Þarna voru Magnús Ragnarsson leikari, Bogi Nils Bogason forstjóri Icelandair, Vigdís Hlíf Jóhönnudóttir starfsmaður í markaðsdeild Landsbankans og Lilja Björk Einarsdóttir bankastjóri Landsbankans mætt í stuði. Þar var líka Gísli Brynjólfsson markaðsstjóri Icelandair og Hulda Bjarnadóttir forseti GSÍ.