Leikarinn Hilmir Snær Guðnason brá undir sig betri fætinum í gærkvöld og mætti í sínu fínasta pússi á Íslensku sviðslistaverðlaunin, Grímuna, sem haldin voru við hátíðlega athöfn í Borgarleikhúsinu.

Hilmir Snær var tilnefndur sem leikari í aðalhlutverki fyrir hlutverk sitt í leikverkinu Köttur á heitu blikkþaki en laut í lægra haldi fyrir Sigurði Sigurjónssyni sem vann Grímuverðlaunin fyrir leik sinn í sýningunni Heim.

Hilmir Snær tók sér örstutt frí frá bleyjuskiptum til að vera viðstaddur hátíðarhöldin og fagna fjölbreyttu og líflegu leikári með kollegum sínum, en eins og flestir landsmenn vita þá eignaðist hann dóttur með leikkonunni Völu Kristínu Eiríksdóttur nú á dögunum.

Vala Kristín greindi frá fæðingu stúlkunnar á Instagram-síðu sinni um liðna helgi.