Það var glatt á hjalla í Safnahúsinu við Hverfisgötu í gær þegar Ragnar Jónasson rithöfundur fagnaði útkomu bókar sinnar, Emilía - Draugasaga.

Boðið var upp á freyðivín og fjörugar samræður en vel var mætt af fólki úr ólíkum hópum samfélagsins. Bergþór Ólason, þingmaður Miðflokksins, lét sig ekki vanta og heldur ekki Þorvaldur Davíð Kristjánsson leikari. Þar var líka Brynjar Níelsson lögmaður, Hallgrímur Helgason, rithöfundur og myndlistarmaður og Þóra Þ. Guðjónsdóttir sem er einn best klæddi hjúkrunarfræðingur landsins. Katrín Jakobsdóttir, fyrrverandi forsætisráðherra og rithöfundur, mætti en hún og Ragnar skrifuðu saman glæpasöguna Reykjavík sem kom út fyrir þremur árum. Stuðmaðurinn Jakob Frímann Magnússon lét sig ekki vanta og heldur ekki hjónin Unnur Ólafsdóttir og Þórarinn Eldjárn, rithöfundur og skáld. 

Emilía fjallar um unga konu sem flytur með foreldrum sínum og ömmu inn í timburhús í miðbæ Reykjavíkur. Hún er ekki búin að búa lengi í húsinu þegar hún uppgötvar að hún er alls ekki ein.