Það var vel mætt á Listasafn Íslands þegar Snæbjörn Arngrímsson rithöfundur fagnaði útkomu bókar sinnar Bók vikunnar. Dagur Kári Pétursson, Guðrún Eva Mínervudóttir, Halldór Armand, Bára Huld Beck, Jón Kaldal, Húbert Nói og Bragi Ólafsson létu sig ekki vanta og fögnuðu með Snæbirni.

Snæbjörn var á árum áður umsvifamikill bókaútgefandi, bæði á Íslandi og í Danmörku, en söðlaði síðan um og fór að skrifa bækur. Bók vikunnar er fyrsta skáldsaga hans en áður hefur hann sent frá sér tvær glæpasögur og tvær verðlaunabækur fyrir börn.

Í Bók vikunnar segir frá Húna sem er nýkominn til borgarinnar. Honum býðst starf á litlu skóverkstæði í Reykjavík meðfram námi í háskólanum. Gamli skósmiðurinn lést fyrir skömmu og Húni fær það hlutverk að afgreiða ósótta skó til viðskiptavina.

Húni kemur úr afskekktri sveit, fullur efasemda um nútímann og á því nokkuð erfitt með að fóta sig í bænum. Til að flækja tilfinningalíf hans enn frekar kynnist hann Júlíu sem honum þykir bæði óútreiknanleg og heillandi. Dag einn þegar hann situr á skóverkstæðinu fær hann hugmynd sem gæti bæði unnið hjarta Júlíu en um leið uppfyllt draum hans um að setja mark sitt á menningarlífið í borginni.

Eins og sjá má á ljósmyndunum var heilmikið stuð í útgáfuboðinu!