Kvenorkan fór yfir mælanleg mörk þegar HS Veitur buðu Konum í orkumálum, KÍO, í heimsókn til sín. 60 konur, sem starfa í orku- og veitugeiranum, kynntu sér starfsemi og höfuðstöðvar fyrirtækisins í Reykjanesbæ.

Heimsóknin var liður í starfsemi KÍO, sem er faglegt tengslanet kvenna sem starfa í orku- og veitugeiranum. Markmið KÍO er að efla tengsl, miðla þekkingu og auka sýnileika kvenna í greininni.

„Við tókum á móti frábærum hópi kvenna sem starfa innan orku- og veitugeirans. Ég er stolt af því að tilheyra hópi kvenna í orkumálum á Íslandi. Frá því ég steig inn í geirann fyrir rúmlega tveimur árum síðan hef ég tekið eftir því hvað við búum að ótrúlega flottum hópi hæfileikaríkra kvenna og megum við vera duglegri að segja frá og sýna hvað í okkur býr,“ segir Sigrún Inga Ævarsdóttir, samskipta og markaðsstjóri HS Veitna.

Hópurinn fór í rútuferð inn í Grindavík þar sem jarðhræringar, jarðsig, sprungumyndanir og eldgos hafa sett strik í reikninginn í rekstri veitukerfa bæjarins á undanförnum mánuðum og í kjölfarið fengu þær stutta kynningu á fyrirtækinu frá forstjóra HS Veitna, Páli Erland sem hefur fengið ýmsar áskoranir í fangið frá því að hann tók við því hlutverki fyrir tæplega þremur árum síðan.

Páll sagði frá því hvað fyrirtækið væri framsækið í veiturekstri á Íslandi. Það er fyrsta veitufyrirtækið á Íslandi til að klára innleiðingu snjallmæla hjá öllum viðskiptavinum svo dæmi séu tekin. Páll sagði líka frá nýju skipuriti sem tekið hefur gildi en þar er í fyrsta skipti jafnt kynjahlutfall í framkvæmdastjórn. Þetta er í fyrsta skipti í sögu fyrirtækisins sem það  er þannig.