Athafnakonan Marín Magnúsdóttir fagnaði útkomu sinnar fyrstu bókar á dögunum. Marín er virk í leik og starfi og lætur til sín taka í nýsköpunarverkefnum og ýmsum góðgerðarverkefnum, á borð við Riddarar kærleikans.

Um er að ræða barnabókina Hera og Gullbrá sem er byggð á sönnum atburðum. Sunneva Guðrún Þórðardóttir er myndahönnuður bókarinnar. 

Hera og Gullbrá fjallar um Sögu Margréti sem er hrædd við hunda og verður yfir sig hissa þegar fjölskyldan hennar ættleiðir Labradorhundinn Heru. Fyrr en varir verða þær þó perluvinkonur enda er Hera svo góð við allt og alla. Í sumarbústaðarferð fundu þau pínulítinn gæsarunga sem neitaði að víkja frá þeim og fékk nafnið Gullbrá. Hera tók Gullbrá undir sinn verndarvæng og til varð sönn og hugljúf saga sem segir frá óvæntri og fallegri vináttu. Hera er í dag heimsóknarhundur Rauða krossins og fer ásamt Marín að heimsækja hópa eða einstaklinga en markmið Hundavina er að rjúfa félagslega einangrun og létta einstaklingum lífið.

Það var fullt út úr dyrum í útgáfuboðinu enda er Marín vinamörg og vinsæl.