Bókaútgáfan Salka fagnaði 25 ára afmæli í vikunni. Margt var um manninn í verslun þeirra á Hverfisgötu þar sem rithöfundar, hönnuðir, útgefendur og aðrir þekktir úr menningarlífinu komu saman til að fagna.

Þar mátti sjá í góðum félagsskap Bergstein Sigurðsson, þáttastjórnanda Kastljóss á RÚV, Elizu Reid, rithöfund og fyrrverandi forsetafrú, Lilju Ósk Snorradóttur, rithöfund og eiganda framleiðslufyrirtækisins Pegasus, Önnu Rún Frímannsdóttur rithöfund og menningarblaðamann á Morgunblaðinu, Sólveigu Pálsdóttur, leikara og rithöfund, og tónlistarmanninn Kristján Frey Halldórsson.

Tríóið Fjarkar sá um ljúfa og skemmtilega tóna í boðinu.

Þann 1. október síðastliðinn voru tíu ár síðan þær Dögg Hjaltalín og Anna Lea Friðriksdóttir tóku við rekstri Sölku af stofnanda útgáfunnar, Hildi Hermóðsdóttur. Bókabúð Sölku var svo opnuð árið 2021 og þar með rættist draumur þeirra Daggar og Önnu að reka verslun með bækur og stað þar sem hægt er að halda upplestra, vera með bókaklúbba og fleiri viðburði.