Það voru allir í hátíðaskapi þegar Árni Helgason lögmaður fagnaði útgáfu sinnar fyrstu skáldsögu Aftengingu. Teitið fór fram í Sjálfsstæðissalnum, sem var viðeigandi því það var ekki þverfótað fyrir flokkbræðrum og systrum Árna. Hildur Björnsdóttir oddviti Sjálfstæðisflokksins í Reykjavík mætti og það gerði líka Sveinn Andri Sveinsson lögmaður, Halldór Benjamín Þorbergsson forstjóri Heima og Sigurður Kári Kristjánsson lögmaður. Una Sighvatsdóttir fyrrverandi starfsmaður Höllu Tómasdóttur forseta Íslands lét sig heldur ekki vanta. Þar voru líka hjónin Guðný Hilmarsdóttir ljósmyndari og Jordi Pujola rithöfundur og hagfræðingur sem skrifar reglulega pistla inn á Smartland. 

Aftenging fjallar um fimm gamla vini sem ákveða að kúpla sig út úr amstri hversdagsins og bregða sér um helgi út í eyjuna Grið. Á þessari eyðieyju hefur auðmaður byggt upp íburðarmikla aðstöðu þar sem gestir geta slakað á og aftengst snjallsímum og samfélagsmiðlum enda nær ekkert netsamband á eyjunni. Barnlaus helgi í bústað með besta fólkinu, eins og Facebook-grúppa helgarinnar heitir, tekur hins vegar óvænta stefnu þegar fréttir fara að berast í gegnum stopult netsambandið um víðtækan gagnaleka í þjóðfélaginu. Útgefandinn segir að Aftenging sé hvöss en glettin saga úr samtímanum um fólk sem baslar í sínu – og hvernig vináttu reiðir af á tímum þar sem tækin þekkja okkur betur en við sjálf og gleyma engu.

Eins og sjá má var mikið fjör á staðnum!