Það var tilfinningaþrungin stemning í Sykursalnum þegar Kraftur, stuðningsfélag fyrir ungt fólk með krabbamein, hélt kröftuga kvennastund. Viðburðinn var haldinn í tilefni af bleikum október og tileinkaður ungum konum sem hafa greinst með krabbamein. Sara Ísabella Guðmundsdóttir, Hildur Björnsdóttur og Arna Ösp Herdísardóttir sögðu frá sinni reynslu á einlægan hátt og uppskáru tár og hlátur á meðal gesta. Leikkonan Birna Rún Eiríksdóttir var fundarstjóri en hún lauk kvöldinu með því að hafa gellubingó.

Sara Ísabella Guðmundsdóttir er 26 ára og nýbökuð móðir. Stuttu eftir að hún eignaðist sitt fyrsta barn greindist hún með eitilfrumukrabbamein. Sara sagði frá þeirri reynslu að greinast með krabbamein um leið og hún tekst á við móðurhlutverkið.

Arna Ösp Herdísardóttir meistaranemi í íþróttafræði greindist með krabbamein í heila 36 ára gömul. Hún missti móður úr krabbameini sem unglingur og sagði frá því þeirri reynslu að vera aðstandandi og að vera sjálf greind með krabbamein.

Hildur Björnsdóttir oddviti Sjálfstæðisflokksins í borgarstjórn og fjögurra barna móðir greindist með óskurðtækt æxli 2016. Það reyndist vera non-Hodgkins eitlakrabbamein. Hún sagði frá sinni reynslu.