Ólafur Ragnar Grímsson, fyrrverandi forseti Íslands, fór í betri buxurnar, setti á sig bindi og skundaði í Hafnarhúsið til að fagna með Katrínu Jakobsdóttur, fyrrverandi forsætisráðherra og Ragnari Jónassyni rithöfundi. 

Vel var mætt í boðið og mátti sjá þar ýmsa aðila úr atvinnulífinu. Lára Björg Björnsdóttir, fyrrverandi aðstoðarmaður Katrínar, mætti með föður sinn, Björn Ragnarsson tannlækni, en hann er tíður gestur á félagsmiðlum Láru þar sem hann fer yfir málefni líðandi stundar á áhugaverðan hátt. Eliza Reid, rithöfundur og fyrrverandi forsetafrú, gerði sér ferð úr Garðabænum og Logi Bergmann Eiðsson kom alla leið frá Washington þar sem hann býr um þessar mundir ásamt eiginkonu sinni, Svanhildi Hólm Valsdóttur, sendiherra Íslands. 

Franski spítalinn fjallar um mann sem finnst látinn á franska spítalanum á Fáskrúðsfirði í febrúar 1989. Þetta gerist í draugalegu timburhúsi sem er í niðurníðslu. Sunna sem er blaðamaður á Morgunblaðinu fer austur til að grennslast fyrir um málið en bæjarbúar vilja lítið við hana tala og brátt fer hún að óttast um öryggi sitt og sinna nánustu.

Árið 2022 leiddu Katrín og Ragnar saman hesta sína þegar þau skrifuðu saman bókina Reykjavík sem naut vinsælda. Franski spítalinn ætti því ekki að svíkja neinn. 

Eins og sjá má á ljósmyndunum var mikið stuð í teitinu!