Kærastan er ólétt eftir vinnufélaga sinn

Maður leitaði ráða hjá Deidre, ráðgjafa The Sun, en kærastan hans er ólétt eftir annan mann og hann veit ekki hvort hann á að fara frá henni eða ekki. 

„Kærastan mín er ólétt eftir vinnufélaga sinn sem hún átti einnar nætur gaman með. Hún sér eftir framhjáhaldinu en vill ekki eyða fóstrinu. Ég er 36 ára og kærastan mín 34 ára. Við erum búin að vera saman í tvö ár og ég elska hana. Hún á þriggja ára son frá fyrra sambandi en ég elska hann eins og hann væri mitt eigið barn. Hann er frábært barn. Upp á síðkastið hef ég verið að hugsa um að flytja inn með henni. Ég er ekki alltaf til staðar vegna vinnu minnar, hún vinnur fulla vinnu og mamma hennar sér um barnið. Hún endaði á því að sofa hjá vinnufélaga sínum þegar hún var í vinnuferð og ég var í burtu í þrjá mánuði.

Þau fóru út að borða með hinum vinnufélögunum. Hún varð drukkin og segist bara hafa ætlað að tala við hann á hótelherberginu hans. Það endaði á því að þau fóru að kyssast og eitt leiddi af öðru. Hún skammaðist sín eftir þetta. Ég fann að hún lét undarlega þegar ég hitti hana tveimur vikum seinna en ég sagði ekkert. Mánuði seinna missti hún út úr sér að hún væri ólétt eftir þennan mann.

Ég er ekki einu sinni reiður. Ég er bara leiður, svikinn og niðurdreginn af því ég veit ekki hvað ég á að gera. Hún hefur sagt mér að hún elski mig og sjái eftir því sem gerðist. Hún virðist vera einlæg. Við erum búin að ræða saman en hún er hörð á því að fara ekki í fóstureyðingu. Ég veit ekki hvort ég á að halda áfram í þessu sambandi og bjóða barnið velkomið þegar það fæðist eða ganga burt í ástarsorg.“

Deidre segist dást að því hvernig maðurinn tekur þessu öllu en bendir honum á að hann þurfi að taka alvarlega ákvörðun.

„Það er eitt að sjá um barn annars manns frá fyrra sambandi en annað þegar barnið er til komið vegna framhjáhalds maka. Voruð þið kannski búin að reyna að koma í veg fyrir að eignast barn saman? Það væri hræðilegt fyrir barnið ef því fyndist eins og „pabbanum“ væri í nöp við sig. Þú elskar kærustuna þína augljóslega mikið og hún er raunverulega miður sín svo það er þess virði fyrir þig að vinna úr tilfinningum þínum til þess að sjá hvort þú getir elskað þetta barn eins og þú elskar bróður þess. Hvað sem öllu líður þá er þetta alls ekki barninu að kenna.“

Konan segist ennþá elska manninn. Ljósmynd/Getty images

• Blogga um frétt