Sum sambönd eru einfaldlega dauðadæmd frá byrjun. Nei, ástæðan er ekki endilega of mikill aldursmunur eða af því konan er hávaxnari eins og í tilviki Tom Cruise og Katie Holmes. Ástæðan er frekar sú að fólk sýnir of mikla ástríðu.
Women's Health greinir frá rannsókn þar sem fylgst var með 168 pörum á 13 ára tímabili. Í ljós kom að þau pör sem sýndu hvort öðru óvenjumikla ástúð voru líklegri til að hætta saman.
Sérfræðingur segir í greininni að ástríða sem þessi verði vandamál þegar hún er eina tengingin eða aðaltengingin í sambandinu. Hveitibrauðsdagarnir endast ekki endalaust og þegar samband er aðallega byggt á líkamlegum áhuga koma upp vandamál þegar á líður.
Einnig getur þörfin fyrir að sýna ástúð sína í gríð og erg verið vegna þess að eitthvað skortir í sambandinu. „Einstaklingar geta fundið þörf til þess að sýna öðrum eða jafnvel maka sínum að allt sé í lagi og sönnun þess er í of mikilli ástúðlegri hegðun.“