Það vakti athygli í síðasta mánuði að söngkonan Ariana Grande og grínistinn Pete Davidson trúlofuðu sig eftir nokkurra vikna samband. Þau eru þó ekki eina parið í heimi hinna ríku og frægu sem hefur trúlofað sig eftir stutt kynni eins og vefurinn Elite Daily rifjaði upp.
Lamar Odom og Khloé Kardashian
Körfuboltakappinn og raunveruleikastjarnan trúlofuðu sig árið 2009, aðeins þremur vikum eftir að þau hittust. Þau giftu sig síðan níu dögum síðar og leið því aðeins um mánuður frá því þau kynntust og þar til þau voru orðin hjón. Eftir stormasamt samband skildu þau loks árið 2016.
Amy Schumer og Chris Fischer
Aðeins tveimur dögum eftir að þau opinberuðu samband sitt gengu leikkonan og kokkurinn í hjónaband.
Katy Perry og Russell Brand
Söngkonan og grínistinn trúlofuðu sig árið 2009 aðeins þremur mánuðum eftir að þau byrjuðu að hittast. Þau giftu sig árið 2010 en ári seinna sótti Brand um skilnað.
Mariah Carey og Nick Cannon
Söngkonan og grínistinn voru búin að vera saman í sex vikur þegar þau gengu í það heilaga. Þau endurnýjuðu síðan heitin á hverju ári en skildu loks árið 2014.
Britney Spears og Kevin Federline
Söngkonan bað dansara sinn, Kevin Federline, að giftast sér stuttu eftir að þau byrjuðu saman. Þau tilkynntu trúlofun sína í júlí 2004 eftir þriggja mánaða samband og giftu sig í september sama ár. Spears sótti um skilnað eftir rétt rúmlega tveggja ára hjónaband.