Meðvirkni á vinnustaðnum

Þegar fólk fær tækifæri á að vera besta útgáfan af …
Þegar fólk fær tækifæri á að vera besta útgáfan af sér á vinnustaðnum breytist líðan viðkomandi. Meðvirkni á vinnustað hefur mikil áhrif. Ljósmynd/Thinkstockphotos

Kona sendir inn bréf vegna þess að vinnustaðurinn hennar er farinn að finna fyrir því að einn starfsmaðurinn er að þróa með sér fíkn í áfengi. Hún biður um ráð þar sem hún er orðin veik af meðvirkni eins og restin af vinnustaðnum. 

Sæl Elínrós.

Mig langar að falast eftir upplýsingum tengdum meðvirkni á vinnustöðum. Tekur þú að þér að skoða slíkt?

Málið er að ég vinn á frábærum vinnustað þar sem mikils er ætlast til af manni, verkefnin eru frekar skýr og endurgjöf góð. Hins vegar hef ég grun um að það sé undir niðri rosaleg meðvirkni í gangi hér. 

Það er mjög margt ekki sagt upphátt, heldur liggur í loftinu. Fólk vinnur hér löngum stundum, þó að við fáum einungis greitt fyrir átta stundir á dag. Einhvers staðar erum við öll í leik, til að þóknast yfirmanni okkar. Við dönsum í kringum einn millistjórnanda sem er að þróa með sér áfengisfíkn að ég held. En enginn segir neitt. 

Sem dæmi þá fórum við öll út saman nýverið og þessi millistjórnandi missti sig alveg í drykkju. Hann byrjaði að ýta við okkur sem störfum með honum, sagði hluti sem ég skil ekki alveg hvaðan koma.

Síðan mætum við öll í vinnu eftir helgina og enginn segir neitt. Ég sé að mannauðsstjórinn er að reyna að taka á þessu af sínum veika mætti. En hvernig get ég sem vinn með honum látið í ljós að hann sé að fara yfir mörkin mín? Hvernig get ég tekið þátt í að vera ekki meðvirk með þessu ástandi.

Þetta er góður starfskraftur, en hann er ekki heiðarlegur þegar kemur að vinnu eða einkalífi sínu. 

Hvað myndir þú gera til að aðstoða okkur? Hvað myndir þú gera sem stjórnandi fyrirtækisins í þessu máli?

Kærar, ein að ég held meðvirk. 

Elínrós Líndal, einstaklings- og fjölskylduráðgjafi, sérhæfir sig í meðvirkni og …
Elínrós Líndal, einstaklings- og fjölskylduráðgjafi, sérhæfir sig í meðvirkni og fíknisjúkdómum. mbl.is/Eggert

Sæl og takk fyrir að senda inn þessa spurningu. 

Það sem þið þurfið er utanaðkomandi einstakling sem kann að takast á við fíknivanda og meðvirkni. Fíkn er sjúkdómur sem fer vanalega versnandi með tímanum. Hægt er að þróa með sér fíkn í mat, áfengi, vímuefni og fólk (ástarfíkn) svo eitthvað sé nefnt. Einn af hverjum tíu körlum í landinu hefur leitað sér aðstoðar á Vog vegna áfengis- og/eða
vímuefnaneyslu. Mörg hjónabönd upplifa stjórnleysi sökum ástarfíknar eða vanda og talsvert margir í þessu landi eru í basli með þyngdsína. Af þessum sökum verðum við
að gera ráð fyrir því að hluti fólks á vinnustöðum sé í vanda og sumir jafnvel að byrja að þróa með sér fíkn.

Af því þú spyrð mig beint hvað ég myndi gera til að aðstoða ykkur og hvaða ráð ég myndi gefa stjórnanda ykkar þá myndi ég gera eftirfarandi:Stjórnandi ykkar þarf að vita hvernig hann getur orðið hluti af lausninni. Ég veit að ef hann fær aðstoð frá fagaðila til að taka það sem kallast „intervention“ fengi hann fræðslu um fíknisjúkdómnn, hvernig best er að taka á honum og hvernig hann getur orðið hluti af bata þess sem er að þróa með sér fíknina.

Meðvirkni er að láta sem ekkert hafi gerst. Það þarf hugrekki í þessa aðgerð. Samtalið er vanalega gert undir handleiðslu og fer fram á þann hátt að stjórnandi sest niður með
starfsmanni og bendir á að hann telji að um vandamál sé að ræða.
Best er að hafa samtalið hlýlegt og þægilegt. Eins er mikilvægt að vera með hugmynd að lausn í sjónmáli. Flottustu leiðtogarnir bjóða upp á nokkrar lausnir í samtalinu. En það
þarf góðar upplýsingar til þess að vita næstu skref og þau ættu að vera leidd áfram af fagfólki.


Ég er á því að minnsta inngripið sé alltaf best, en mjög oft er nauðsynlegt að viðkomandi starfsmaður fari í meðferð.
Ef stjórnandinn getur leitt starfsmann sinn í áttina að bata, mun hann án efa vera með afar þakklátan einstakling í vinnu til frambúðar.

Mikilvægast er að gera samninga í þessum viðtölum.
Það sem vinnustaðurinn þarf aðstoð með að skilja er að það velur sér enginn að vera ekki með stjórn á því sem hann borðar, hvern hann elskar eða hvað hann drekkur mikið. En
það er alltaf staður og stund til að taka ábyrgð og gera eitthvað í hlutunum.

Að takast á við meðvirkni á vinnustaðnum er áhugavert verkefni. Starfsmenn sem ná tökum á meðvirkni eru opnari og ánægðari í vinnunni en þeir sem eru meðvirkir.

Hægt er að vera með vinnustofur, einstaklingsfundi og fræðslu um heilbrigð samskipti og meðvirkni.

Rithöfundurinn Norman Vincent Peale sagði hluti af því að vera lifandi, sé að vera með vandamál og verkefni að leysa.

Heilbrigðustu vinnustaðirnir að mínu mati gera ráð fyrir því.

Kær kveðja, Elínrós Líndal.

Ligg­ur þér eitt­hvað á hjarta? Þú get­ur sent El­ín­rós spurn­ingu HÉR. 

mbl.is
Fleira áhugavert
Fleira áhugavert

Spurt og svarað

húðlæknir á Húðlæknastöðinni svarar spurningum lesenda

sálfræðingur á Sálfræðistofunni Sálarlíf svarar spurningum lesenda

einstaklings- og fjölskylduráðgjafi svarar spurningum lesenda

Klínískur félagsráðgjafi hjá Lausninni

hjúkrunar- og kynfræðingur svarar spurningum lesenda

svarar spurningum um lögfræðileg mál