Tony Robbins er einn af þeim sem er ekki fastur í viðjum vanans. Hann er með áhugaverða sýn á ástina eins og flest annað í lífinu.
Hér koma nokkrar sambandshugleiðingar í hans anda.
Hver ætlar þú að vera í þessu sambandi?
Robbins gerir það að atvinnu að aðstoða fólk út úr viðjum vanans. Hann hjálpar fólki víðs vegar um heiminn að skapa sína eigin framtíð óháð því hvaðan það kemur.
Ef þú ætlar að vera í sambandi í hans anda ættir þú að setja fókusinn á þig í sambandinu, ekki maka þinn. Ímyndaðu þér bestu útgáfuna af þér í sambandi, vertu sú útgáfa daglega - sama hvað maki þinn gerir.
Ef þú setur fókusinn á þig í staða maka þíns þá ferðu í áttina að því að gefa í stað þess að þiggja. Það er að hans mati grunnurinn að góðu lífi.
Hvað þarftu að losna við úr æskunni til að verða þessi aðili?
Að mati Robbins er mannfólkið forritað gömlum úreltum hugmyndum. Hann aðstoðar fólk við að losa sig við hugmyndir sem hamlar því og telur hann möguleika á að gera slíkt á skömmum tíma.
Hann er einnig á því að þú ert það sem þú hugsar. Ef þú hugsar sterka hluti þá ertu sterkur/sterk.
Til að geta losað okkur við gamlar hugmyndir úr fortíðinni er gott að skoða hvað við hugsum daglega um okkur sjálf. Robbins sjálfur þurfti að skipta út hugmyndum sem hann hafði um konur. Hann var alinn upp af veikri móður sem lagði m.a. hendur á hann. Ástæðan fyrir því var sú að hún var veik og vanmáttug gagnvart honum.
Til að hann gæti elskað konuna sína skilyrðislaust þurfti hann að taka til í hugmyndum sínum um konur sjálfur. Hann segir alla geta gert þetta, þar sem hann sé lifandi sönnun þess.
Stöðugar hugsanir um höfnun, veikleika og aðrar skilgreiningar sem oft koma upp í hugann á fólki með áföll úr æsku er eitthvað sem Robbins leggur upp með að fólk finni sér leið í gegnum. Hann bendir á að margar leiðir eru í boði. Það eina sem ekki virkar er að gera ekki neitt við þessar hugsanir.
Hvað gerir þessi einstaklingur daglega?
Robbins leggur mikið upp úr því að fólk agi sig upp í að framkvæma það sem það hugsar. Að lifa drauminn og láta ekkert stoppa sig. Ef þú vilt lifa samband í hans anda ættir þú að setja niður á blað hluti sem þú myndir gera sem frábær maki á hverjum degi. Settu þig í fyrsta sætið og síðan maka þinn, börn, atvinnuna, vini og fjölskyldu.
Hvað gerir hann/hún ekki?
Það eru ákveðnir hlutir sem halda okkur niðri í lífinu. Sem skemma möguleika okkar til að vera ein og sama manneskjan hvert sem við förum. Ef þú ert að gera hluti sem eru að meiða þig þarftu að setja niður á blað hvaða hlutir þetta eru og æfa þig í að gera þá ekki. Það er engin afsökun fyrir því að gera hluti sem enginn mun vita um, þú munt vita um þessa hluti og þeir munu taka of mikið pláss innra með þér.
Ef þú vilt lifa í anda Robbins heldur þú þig frá þeim hlutum sem halda þér niðri.
Hvernig getur þú orðið betri en maki þinn ætlast til af þér?
Af hverju heldurðu að þú þurfir að vera eins og maki þinn vill hafa þig? Af hverju viltu ekki vera eitthvað aðeins meira en það? Ef þú ert ein/n af þeim sem fær alltaf frábær meðmæli í vinnunni, ert með góða stigagjöf á AIRBNB en enginn af þínum fyrrverandi gæti mælt með þér í sambandi, hver ertu þá raunverulega?
Finndu leiðir til að vera framúrskarandi í einkalífinu líka. Til að vera framúrskarandi er nóg að gera meira en maður gæti hugsað sér daglega frá öðrum. Æfðu þig í þessu dag hvern og sjáðu hvert þú verður kominn eftir einn eða tvo áratugi.
Robbins er á því að fólk ofmeti það sem það geti gert á einu ári en vanmeti það sem getur gerst á heilum áratug.
Hafðu það hugfast í þeim breytingum sem þú ætlar í eftir að hafa lesið þessa grein og mundu að fram til dagsins í dag hefur þú verið að gera nákvæmlega eins vel og þú getur. Málið er bara að Robbins veit að þú getur gert svo mikið betur!