Sævar Þór Jónsson lögmaður hjá Sævar Þór & Partners svarar spurningum lesenda Smartlands. Hér fær hann spurningu frá konu sem seldi fyrirtæki sitt á undirverði. 

Sæll.

Ég seldi fyrirtæki mitt á undirverði og þar að auki tækjabúnað 2014. Er nokkuð hægt að gera eitthvað í þessu í dag? Fá einhverja leiðréttingu eða er þetta fyrnt með undirskrift minni? Kaupendur notuðu sér aðstöðuna, meðan ég var veik á sjúkrahúsi og faðir minn nýlátinn, með milligöngu bróður míns. 

Bestu kveðjur, H

Sævar Þór Jónsson lögmaður/MBA.

Sæl 

Í íslenskum rétti er meginreglan sú að samninga ber að halda. Þessa reglu má rekja allt til Jónsbókar og hefur verið grundvallarregla í vestrænum samfélögum í langan tíma. Að baki reglunni stendur hugmyndin um samningsfrelsið en í því felst að mönnum er frjálst að ákveða hvort gera skuli samninga, að velja sér gagnaðila og að ákveða efni samnings, þar á meðal kaupverð fyrir hinu selda.

Allar undantekningar frá meginreglunni eru skýrðar þröngt af dómstólum samkvæmt almennum lögskýringareglum. Þröngar skorður eru því settar fyrir því að samningsaðilar geti vikið samningi til hliðar eða breytt efni hans meðal annars kaupverði einkum eftir svo langan tíma og raun ber vitni. Þá standa ólögfestar meginreglur kröfuréttar um tómlæti yfirleitt í vegi kröfum af þeim toga. Meginreglan er sömuleiðis sú að kröfuréttindi fyrnist á fjórum árum, sbr. 3. gr. laga nr. 150/2007 um fyrningu kröfuréttinda.

Kær kveðja, 

Sævar Þór Jónsson lögmaður/MBA

Liggur þér eitthvað á hjarta? Þú getur sent Sævari Þór spurningu HÉR. 

Tengdar fréttir

Spurðu lögmanninn

Skerðist ellilífeyrir ef húsið er selt og minni íbúð keypt?

• Er söluhagnaður íbúðarhúsnæðis undanþeginn skattlagningu?
• Skerðir arfur ellilífeyri?
• Getur faðir gert erfðaskrá og rýrt hlut sonar síns?
• Skerðast tekjur hjá eldri borgurum við sölu á sumarhúsi?

» Fleiri tengdar fréttir

• Blogga um frétt