Sólveig Þórarinsdóttir, eigandi Sóla sem er jógastúdíó, og Hólmar Logi Sigmundsson endurnýjuðu heitin í gær í Dómkirkjunni. Hjálmar Jónsson prestur stýrði athöfninni og veitti hjónabandi þeirra áframhaldandi blessun.
Sólveig hefur vakið athygli víðsvegar um heiminn vegna áhrifaríkrar sögu sinnar. Hún starfaði um árabil við verðbréfamiðlun en sneri við blaðinu, aflaði sér kennsluréttinda í jóga í Asíu og opnaði jóga- og heilsusetrið Sólir þar sem heildræn nálgun á bætta heilsu er ástunduð. Sólveig hefur haldið TED-fyrirlestra undir nafninu Love Warrior þar sem hún fjallar um ástina í víðu samhengi og leiðir til að upplifa hamingju í lífinu.
„Lykillinn að okkar farsæla sambandi er að við höfum gefið hvort öðru rými til að vaxa. Við höfum verið saman í ein 25 ár en giftum okkur ekki fyrr en fyrir 10 árum þegar ég bað hans þegar ég var að fæða annað barn okkar. Yngsti sonur okkar hefur oft vænt okkur um að hafa skilið sig útundan þegar við giftum okkur, en hann var getinn í brúðkaupsferðinni. Við erum því að heiðra ástina í dag og einnig samferðina okkar allra. Með því að endurnýja heitin fengu nú öll börnin að vera fullgildir þátttakendur,“ segir Sólveig.
Smartland óskar hjónunum innilega til hamingju með ástina!