Með titrara í stað Óskarsverðlauna

Athafnakonan Gwyneth Paltrow nýtti kórónuveirufaraldurinn til þess að búa til kynlífstæki. Óskarsverðlaunaleikkonan kynnti nýverið titrara sem merki hennar Goop er nýbyrjað að framleiða. 

Paltrow birti mynd af sér á Instagram með titrarann. Í stað þess að taka nýja mynd með titrarann klippti hún hann inn á mynd sem var tekin af henni eftir að hún vann Óskarsverðlaunin árið 1999. Unaðstækið fer vel við bleika Ralph Lauren-kjólinn sem Paltrow klæddist á verðlaunahátíðinni fyrir rúmum 20 árum. 

Myndin og tilkynning Paltrow á samfélagsmiðlinum Instagram vakti mikla lukku meðal fylgjenda hennar. „Gwyneth Paltrow eyddi tímanum í heimsfaraldrinum til þess að búa til sinn eigin titrara,“ skrifaði listakonan Cleo Wade í sögu á Instagram og hrósaði stjörnunni. Paltrow endurbirti hrós Wade og sagðist hafa þurft að gera eitthvað við tímann. 

• Blogga um frétt