Hollywoodhjónin Michael Douglas og Catherine Zeta-Jones fögnuðu brúðkaupsafmæli 18. nóvember. Douglas óskaði konunni sinni til hamingju með daginn á Instagram en hjónaband þeirra hefur ekki alltaf verið dans á rósum.
„Til hamingju með brúðkaupsafmælið elsku Catherine! Ég elska þig svo mikið,“ skrifaði hinn 77 ára gamli Douglas og birti gamlar myndir af sér og eiginkonu sinni sem er 25 árum yngri en eiginmaður hennar.
Leikarinn Danny DeVito kynnti hjónin sem trúlofuðu sig á gamlársdag árið 1999. Þau giftu sig síðan þann 18. nóvember árið eftir. Veislan fór fram á Plaza-hótelinu í New York og var talað um brúðkaupið sem hjónaband ársins hjá BBC.
Það hefur þó ekki allt gengið eins og í sögu hjá hjónunum og eftir erfitt tímabil slitu þau samvistir árið 2013. Ári seinna voru þau aftur flutt inn saman og sögðu þau þá að hjónabandið hefði aldrei verið betra.
Hér fyrir neðan má sjá nokkrar gamlar og góðar myndir af þeim hjónum.