Smartland Mörtu Maríu | Stjörnuspá | mbl | 4.4.2025 | 10:25

Aprílspá Siggu Kling er björt

Sigga Kling er mætt með splunkunýja stjörnuspá. Ljósmynd/Aldís Pálsdóttir

Spákonan Sigga Kling rannsakaði apríl og þá kemur ýmislegt í ljós. Hrúturinn á til dæmis ekki að kaupa sér nýjan bíl eða nýtt húsnæði og krabbinn á að sleppa tökunum af maka sínum. Á sama tíma þarf bogmaðurinn að muna að það er ekki gott að vera ástfanginn af ástinni sjálfri.

Hrútur: Draumar verða að veruleika

Elsku hrúturinn minn.

Kannski er svolítið furðulegt að nefna það en þú ert að fara inn í 15 ára tímabil þar sem ótrúlegir hlutir og ævintýri munu birtast þér. Það bæði léttir á hjarta þínu og eiginlega er hægt að segja að þú sláir í gegn!

Neptúnus var að fara inn í merkið þitt en það hefur ekki gerst síðan árið 1861 (ef þú manst eftir því!). Þú hefur mikið þurft að treysta á sjálfan þig og þú ert hörkumanneskja þó margar hindranir hafi mætt þér.

Lífið er eins og Monopoly eða Matador, þú lendir ekki alltaf á besta reitnum til að kaupa húsið í þeim leik. En núna hefurðu kraftinn til að þú lendir á réttum reitum. Það eina sem getur skyggt á þig að einhverju leyti er sjálfsvorkunn út af einhverju – þá muntu tapa völdum.

Það er heldur ekki hollt fyrir neinn að vorkenna einhverjum öðrum. Það kallar ekki fram góðar hugsanir, hvorki til þín né annarra.

Lesa meira

Nautið: Þar sem fókus fer, lífið er

Elsku nautið mitt.

Þú ert að fara inn í tímabil þar sem þú þarft að vera staðfast og hugrakkt. Ekki er nóg að ráðast á garðinn þar sem hann er lægstur, heldur hæstur. Þú ert mikill hermaður en samt hermaður friðarins. Þegar ekkert annað dugar þarftu að taka til þinna ráða og ráðast á verkefnið.

Ekki hugsa samt allt of mikið fram í tímann. Taktu eina mínútu í einu í huganum, þannig nærðu öllu sem þú hefur verið hrætt við. Þetta getur tengst mörgu – skóla, fjölskyldu, vinum eða þess háttar.

Ég sé eitthvert óréttlæti tengt peningamálum sem þú þarft að takast á við og þegar þú gerir það birtast töfrar.

Þú átt eftir að finna mikið fyrir ást og kærleika. „Kærleikur“ er mitt uppáhaldsorð og ef þú skoðar t.d. enskuna eiga þeir bara orðið „ást“ (e. love).

Þú skalt leggja hönd á hjarta og biðja um þennan fallega kærleika sem er allt í kringum þig og á að vernda þig gagnvart öllu. Alls ekki nota reiðina í því sem þú þarft að laga heldur skrifaðu niður stikkorð varðandi hvað þú ætlar að segja og leggðu svo af stað.

Lesa meira

Tvíburinn: Sterk orð skapa sterkt líf

Elsku tvíburinn minn!

Jæja, þinn tími er kominn. Þú ert búinn að ganga í gegnum svo tilfinningaríkt tímabil að þú hefur ekki alveg getað gert þér grein fyrir hvort þú sért að fara norður eða niður – austur eða vestur.

Nú er verið að stilla straumana þína af. Þú skalt hvorki syrgja hið gamla né ímynda þér að morgundagurinn gefi þér ekki betri tíð.

Svo gæti verið að þú hafir verið að fara í gegnum veikindi, eitthvað tengt öndunarveg. Lungu og öndun eru tákn fyrir tilfinningar. Ég er ekki að segja að þú eigir að vera tilfinningalaus heldur þarft þú að taka sérstaka ákvörðun um hvað þú ætlar að gera í næsta skerfi.

Þetta þýðir einnig að þú getir tekið ákvörðun um eitthvað annað í þessum mánuði. „Nei, ég ætla að gera þetta,“ „Já, ég ætla.“ Notaðu sterk orð því þau skapa sterkt líf.

Lesa meira

Krabbinn: Þú þarft ekki að monta þig

Elsku krabbinn minn.

Þú ert einn af fjórum merkjum sem er að fara inn í ótrúlega merkilegt tímabil sem mun vara næstu 15 ár. Þar af leiðandi er að lokast visst karma sem hefur verið að bíta í þig.

Það hreinsast út það sem hefur haldið þér niðri og þú ferð áfram eins og Speedy Gonzales! Þú stendur svo öflugur og jákvæður gagnvart vitleysunni sem er alls staðar að malla í kringum þig.

Þá er ég að meina hvað er að gerast í henni veröld eða hvers vegna þetta er svona hér á landi og svo framvegis. Þú ert að fara inn í tímabil andlegs viðhorfs og færist alltaf nær og nær því að ná hinni himnesku tengingu um hver þú ert og hvernig þú framkallar sjálfan þig.

Þú skalt æfa þig í að hætta að pirrast út í persónu sem er nákomin þér, hún kann að hringja í þig oft út af engu. Æfðu þolinmæði þína því þá finnurðu ljósið í huga og sál og einnig sérðu á hversu góðum stað þú ert í lífinu.

Gefðu skilyrðislaust af þér til einhverra sem eiga það jafnvel ekki skilið, hjálpaðu þeim sem þú hefur e.t.v. ekki hjálpað áður og þá skynjarðu hvernig sú hjálp eflir þig. Þú þarft ekki að monta þig af neinu þó þú megir það því fólk sem sér þig skynjar hæfni þína.

Lesa meira

Ljón: Gerðu áætlanir sex mánuði fram í tímann

Elsku ljónið mitt.

Þér finnst lítið vera að gerast eða að fara í þá átt sem þú vilt. Þú þarft að sleppa tökunum, setja frið í hugann og leyfa lífinu að leysa hnútana fyrir þig.

Þú átt eftir að finna mikil áhrif frá Neptúnusi sem fór inn í hrútsmerkið þann 30. mars og það eru skilaboð til þín. Þó þú eigir ekki að stjórnast í öllu þarftu að hafa 100% plan fyrir næstu sex mánuði í hið minnsta.

Þú skrifar niður lukkulistann, getur ákveðið að fara í sund tvisvar í viku, að efla námið, gera eitthvað varðandi vináttu eða eitthvað annað. Þetta er svo mikilvægt að þú trúir því vart.

Þú skalt skrifa niður 20 atriði á tveimur mínútum því þegar þú ert að hugsa ofsalega hart hvað þú ætlir að gera er eins og heilabúið á þér sé fullt af fyllibyttum sem eru að senda sömu hugsun. Þegar þú gerir þetta sem ég var að benda á gerist þetta ósjálfrátt og af sjálfu sér.

Lesa meira

Meyjan: Mikilvægt að fagna öllu sem á sér stað!

Elsku meyjan mín.

Þú ert eitt af þeim flugheppnu fjórum merkjum sem er að fara í umbreytingu, yfirhalningu og ferð að taka á móti svo mörgum gjöfum frá mættinum í öllu.

Þetta er vegna þess að Neptúnus skreið yfir í hrútinn og hann hefur ekki verið þar í 140 ár! Þú munt græða svo mikið á þessari plánetustöðu. Þú eflist líkamlega og tekur þig á að einhverju leyti ef eitthvað vantar upp á þar.

Þegar það byrjar að þróast fylgir náttúrlega hugurinn með – þú verður miklu fljótari að hugsa hvernig þú kemur þér í eitthvað sem þú vilt eða alveg sama hvað þér dettur í hug.

Gerist sú hugsun hratt og þú framkvæmir, þetta tvennt helst í hendur. Sérstaklega skaltu hafa augun opin þann 13. apríl, og 14. til 17. apríl. Þetta eru mikilvægir dagar. Þú munt finna og skynja lausnirnar.

Lesa meira

Vogin: Eins og þú fáir auka líf í þessum mánuði

Elsku vogin mín.

Þú ert í þann mund að hefja eitt sérstæðasta tímabil sem hefur gerst á þinni ævi! Í kringum 14. apríl (og reyndar 14. október, eins furðulega og það hljómar!) gerist eitthvað ótrúlega merkilegt í kringum þig.

Ég sé hugarfarsbreytingu og sjálfstraustið og orkan þín gerir þig svo teinrétta. Þú hættir að vorkenna fólki eins mikið og þú hefur gert og leyfir hlutunum að rúlla sjálfum.

Þú ert eins og bambusinn – þó þú bognir aðeins ferðu strax upp aftur og núna hefur átt sér stað mikil hreinsun. Þó eitthvað erfitt hafi átt sér stað á borð við dauðsfall eða eitthvað erfitt er mikil breyting að eiga sér stað sem hefur þau áhrif að ekkert í raun mun skelfa þig neitt sérstaklega.

Þú ert eitt af þeim fjórum merkjum sem kallast kardínálamerkin. Þau hafa eitthvað alveg extra. Það er eins og þú sért í tölvuleik og fáir auka líf.

Þú finnur að þú breytist og veist í raun ekki alveg af hverju það er. Þér er ætlað að framkvæma mikið en það þarf að framkvæma eitthvað sem færir þér hamingjuna.

Lesa meira

Sporðdreki: Að hika er sama og tapa

Elsku sporðdrekinn minn.

Þú ert alltaf mest spennandi stjörnumerkið. Maður veit aldrei hvort þú sért að koma eða fara því þú ert svo mystískur og getur verið dularfullur. Þú getur nefnilega átt til að hafa einhverja dularfulla hringiðu í kringum þig.

Ekki hugsa þig of lengi um hvað þú ætlar að gera eða hver þú ætlar að vera – farðu bara eftir fyrstu hugsuninni eða tilfinningunni og kláraðu allt sem er á dagskrá hjá þér strax.

Þér finnst þú hafir ekki tíma til að gera þetta eða hitt en skalt athuga að þú ÁTT tímann. Þarft ekki einu sinni að GEFA þér tíma!

Allt raðast svo vel upp hjá þér eins og þú vilt hafa það en varastu að fara ekki í of mikið og margt í einu því þá finnst þér þú vera alveg að lamast og endar á að gera ekki neitt.

Lesa meira

Bogmaður: Ástfanginn af ástinni

Elsku bogmaðurinn minn.

Aldrei þessu vant ertu búinn að standa frammi fyrir svo mörgu sem er að pirra þig. Þig vantar ávallt svör við öllu mögulegu, þess vegna ertu að lesa þessa stjörnuspá!

Þetta vesen sem er í kringum þig tengist einhverju í fjölskyldunni, mitt ráð til þín er að reyna að skipta þér ekki of mikið af öllu. Því þegar nokkrir dagar, vika eða tíu dagar eru liðnir er eins og allt hafi hreinsast af sjálfu sér.

Þú getur hins vegar skapað meira vesen ef þú ætlar að reyna að stjórna öllu eins og guð almáttugur. Þú munt líka leggja drög að ýmsu núna á næstunni, bæði hvað þú ætlar að gera í sumar og ýmislegt sem verður spennandi.

Það fellur á þennan mánuð að skipuleggja þig vel. Það verða margar veislur og mannfagnaðir og þú munt mæta í hvert einasta boð. Þú hefur sterkt tengslanet og getur bjargað þér úr öllu ef þú vilt. Það þarf ekki að vera neitt drama í kringum þig því þú hefur ekki boðið því með.

Lesa meira

Steingeit: Hlaðborð í vændum!

Elsku steingeitin mín.

Þú hefur verið að breyta heilmiklu í kringum þig og henda ýmislegu sem þú þurftir ekki á að halda eða gefa frá þér. Þegar þú ert að gera þetta ertu að hreinsa líf þitt og orkuna.

Alveg eins og þegar þú breytir á heimilinu, færð þér nýjan bíl, ferð í ný föt, klæðir þig á morgnana, ferð í „heimafötin“ (þoli ekki þetta orð, ég er sko alltaf í sparifötum!) allt þetta gerir að verkum að þú ferð í vissan gír og þetta er eitthvað sem einkennir þig núna.

Þú ert eitt af fjórum heppnum merkjum í dýrahringnum núna svo allt sem þú tekur þér fyrir hendur verður að gulli og gæfu. Þú finnur þessa tilfinningu um að þú sért ósigrandi og það er líka hárrétt.

Lesa meira

Vatnsberi: Líf þitt er svo sannarlega ekki lítið

Elsku vatnsberinn minn.

Það er nú svo með þig að þú ert ekki líkur neinu öðru stjörnumerki! Þú skerð þig út og gerir eitthvað sem engum dettur í hug nema þér og skoðar svo margt að aðrir verða hreinlega agndofa í kringum þig.

Það hefur aldrei verið lítið, lífið þitt. Margslungið, já, en aldrei nein lognmolla. Þú skalt vita að þú hefur leyfi og getur skipt um skoðun (sem er reyndar aðalhæfileikinn þinn) og getur farið á allt aðra braut en þú ert nú á.

Þetta er eitthvað sem þú hefur verið að gæla við í huganum og þessi magnaði aprílmánuður gefur þér frelsi og vængi.

Eftir 12. apríl færðu vitneskju um einhverjar merkilegar fréttir, eitthvað sem þú hefur leitað að eða tekið þátt í. Einhver mál í kringum þig og útkoman mun verða mikill sigur fyrir þig.

Þú hefur það fyrir reglu að eiga alltaf varasjóð eða pening í umslagi og „þetta reddast“ er trúlega þín uppáhaldssetning! Vatnsberar geta nefnilega alltaf bjargað sér, alveg sama hvað.

Lesa meira

Fiskurinn: Stórar ákvarðanir í nánd

Elsku fiskurinn minn.

Þú fallega, einlæga vera sem litar líf allra í kringum þig. Þér finnst svo oft þú þurfir að skemmta fólki, þjóna því og vera til staðar fyrir aðra … miklu meira en fyrir sjálfan þig.

Þú einn getur breytt þessu með því að setja þig sjálfan í alvöru í efsta sæti eða allavega ofarlega. Því þegar þú flýtur með fólki eða atburðum í kringum þig finnst þér einn og þú sért að kafna.

Þetta varir bara stutta stund í þessum mánuði en þetta varir ekki svo langan tíma í apríl. Það verður stutt, jafnvel bara í fimm til sex daga fyrir 8. eða 9. apríl. Þá lyftist af þér þessi byrði sem á bakinu er og þú fagnar lífinu, setur í fyrsta gír.

Enginn fær þér haggað eftir þetta tímabil eftir 9. apríl því þú tekur stórar ákvarðanir fyrir þig sjálfan sem eru ekki endilega svo sýnilegar öðrum.

Lesa meira