Þorir ekki að eignast kærustu

Kris Humphries er enn að jafna sig eftir skipbrotið í fyrra og er ákveðinn í að stofna ekki til ástarsambands á nýjan leik fyrr en hann er löglega skilinn við Kim Kardashian.

Körfuboltakappinn og veruleikastjarnan standa í erfiðum skilnaði en hjónaband þeirra á síðasta ári entist aðeins 72 daga eins og frægt er orðið.

Kardashian var ekki lengi ein og er nú með rapparanum Kanye West.

Humphries hefur aftur á móti tjáð vinum sínum að hann ætli ekki í nýtt samband fyrr en skilnaður hans og fyrrverandi eiginkonunnar er genginn í gegn, en það verður væntanlega síðar í sumar.

Nýlegar myndir af körfuboltastjörnunni á Miami-strönd með dökkhærðri konu, sem minnir óneitanlega á Kardashian, komu af stað orðrómi um að hann væri kominn með nýja konu en sú er að sögn ekki raunin.

„Það hvarflar ekki að Kris að fara í nýtt samband fyrr en hann hefur fengið lögskilnað,“ segir vinur hans í samtali við fréttavefinn RadarOnline.

„Hann er ekki tilbúinn í nýtt samband. Hann lifir auðvitað engu munkalífi en hann er ekki byrjaður með nýrri konu, það er alveg  á hreinu,“ segir vinurinn.

• Blogga um frétt