Helgi Hrafn Gunnarsson þingmaður Pírata gekk að eiga unnustu sína, Ingu Auðbjörgu Kristjánsdóttur í gær. Trúlofun þeirra rataði í fréttir en hún bað hans í fyrra.
„Hundrað manns tóku þátt í því þegar Inga Auðbjörg Kristjánsdóttir bað kærasta sinn, þingmanninn Helga Hrafn Gunnarsson, að giftast sér á námskeiði í Reineck-skátakastalanum í Þýskalandi um páskana,“ sagði á vef mbl.is í fyrra.
Inga Auðbjörg bauð Helga Hrafni með sér á námskeiðið sem er alþjóðlegt og haldið fyrir skátaforingja. Hún auglýsti eftir sjálfboðaliðum til að taka þátt í verkefninu með sér. Þegar að stóru stundinni kom var öllum stillt upp og fengu tveir menn það hlutverk að lokka Helga Hrafn á fyrirfram ákveðinn stað svo hann sæi aðeins það sem hann átti að sjá.
Þá gat bónorðsdansinn hafist og hófst hann á því að ein stúlkan dansaði sem spegilmynd Ingu Auðbjargar, sem fyrst í stað var ekki í sjónmáli Helga. Síðan bættust fleiri dansarar í hópinn, hver á fætur öðrum.
Á ákveðnum tíma hlupu allir fram og drógu Ingu fram á sjónarsviðið, sem steig upp sem rós. Þeir sem stóðu fremstir í hópnum lyftu þá klæðum sínum og beruðu maga sína með skilaboðunum „Viltu giftast mér“.
Svarið var í stuttu máli „já“ og voru hringar settir upp.