Hver var einu sinni aðeins mjúkur að framan og í mun slakara formi en hann er í dag? Getur verið að það sé Hannes Þór Halldórsson, markvörður íslenska landsliðsins? Jú, passar. Hann tók sig til og birti þessa gömlu mynd af sér á Instgram um helgina og uppskar ríkulega af lækum enda enginn smámunur á manninum. Sérfræðingar segja að Hannes sé í 200 sinnum betra formi í dag en hann var á sínum yngri árum.
Ekki er allt gull sem glóir því í ljós hefur komið að vinir Hannesar mættu heim til hans um helgina, þar sem hann býr í Danmörku, þar sem markmiðið var að steggja hann. Eitt atriði í steggjun Hannesar var að fá að taka yfir Instagram-reikning hans, pósta mynd að vali vinanna og bæta við texta sem var allur morandi í stafsetningavillum.
Myndin sem vinirnir póstuðu á Instagram var tekin árið 2005 eða áður en Hannes ákvað að verða fáránlega góður í fótbolta. Í samtali við Smartland sagði Hannes að þetta væri eins vandræðalegt og það gæti orðið. En fyrst myndin væri komin á netið þyrfti að koma fram að vinir hans beri ábyrgð á myndbirtingunni.
Hannes á býsna óvenjulegan feril að baki en hann hafði átt við meiðsli að stríða frá unga aldri sem gerði það að verkum að hann var meira á djamminu en að spila. Eða alla vega meðan hann var í Versló.
„Ég var kominn á þann stað að það vissi enginn hver ég var. Það vissi enginn að ég kynni fótbolta. Það var bara ég sjálfur sem hafði trú á því og það var ekkert annað í stöðunni en að taka málin í mínar hendur,“ segir Hannes í viðtali við Hugrúnu Halldórsdóttur í þættinum Ný sýn sem sýndur var í Sjónvarpi Símans.