Andrea Róbertsdóttir fyrrverandi mannauðsstjóri RÚV er orðin framkvæmdastjóri kaffihúsa Kaffitárs. Andrea hætti á RÚV árið 2016 en VB.is greindi frá þessu. Síðan hún hætti hjá RÚV hefur hún verið starfandi ráðgjafi á svið stjórnunar samhliða námi.
„„Þessa er brýnt að gera upp!“ hugsaði ég með mér þegar ég leit í spegil nýverið og planið er að setjast enn á ný á skólabekk. Ég þarf að færa þungamiðjuna örlítið til í lífinu og vera samferða sjálfri mér. Þetta er spurning um fínstillingu, engin dramatík svo það sé á kristaltæru. Sem stjórnandi síðustu ár hef ég lagt ríkulega inn í reynslubankann og dýpkað skilning á ólíkum sviðum. Ég er með MS-gráðu, BA-gráðu og er búin með rafsuðu og Húsmæðraskólann. Draumurinn er að læra bólstrun, húsasmíði, fara í master í umhverfis- og auðlindafræðum og kafa í jákvæða sálfræði. Neikvæðni hefur aldrei hjálpað að mínu mati og jákvæðni telst seint ofmetið stöff. Ég get sagt í einlægni að gleðin er besta víman og gleði er fagmennska!“ sagði Andrea í samtali við Smartland þegar hún hætti á RÚV.
Andrea er með MS gráðu frá viðskipta- og hagfræðideild í mannauðsstjórnun, BA gráðu í félags- og kynjafræði og hefur lokið MA-diplóma í jákvæðri sálfræði.