Kristborg og Kolbrún gera skilnaðarþætti

Kristborg Bóel Steindórsdóttir og Kolbrún Pálína Helgadóttir vinna nú að sjónvarpsþáttunum um skilnaði fólks. Sú fyrrnefnda skrifaði bók um sinn eigin skilnað en bókin 261 dagur kom út síðasta vor. Báðar eiga þær Kristborg Bóel og Kolbrún Pálína það sameiginlegt að hafa gengið í gegnum skilnað. Nú hafa þær skrifað undir samning við Sagafilm og verða sjónvarpsþættirnir sýndir í ágúst á næsta ári en um er að ræða sex sjónvarpsþætti sem sýndir verða í Sjónvarpi Símans.

Frétt af mbl.is

Opnaði mig fyrir sorginni

Þegar þær eru spurðar hvers vegna þær hafi ákveðið að gera þessa þætti segja þær að það vanti fræðandi efni um hjónaskilnaði. 

„Miðaða við fjölda skilnaða í samfélaginu í dag er mikil vöntun á fróðleik og fræðslu fyrir fólk í þessum sporum. Það er í raun ekki til neitt alvöru stoðkerfi fyrir fólk sem er að skilja. Hvort sem um er að ræða andlega aðstoð eða lagalega. Fólk missir oft og tíðum algjörlega fæturna í svona ferli og hefur sama og engan styrk til að takast á við hlutina eða taka réttar ákvarðanir. Um er að ræða algjöran viðsnúning á lífinu oft og tíðum, áföll og sorg sem erfitt er að fá viðurkennda og því fylgir oft mikil örvænting,“ segir Kolbrún Pálína. 

Kolbrún Pálína Helgadóttir.

„Skilnaðir eru mjög algengir á Íslandi og hver og einn þeirra snertir marga, svo sem börn, fjölskyldu og vini þeirra sem fara í sundur. Það er mín skoðun að þættir sem þessir eigi svo sannarlega rétt á sér, en það er alltaf gott að geta tengt við íslenskan raunveruleika. Við munum vinna þetta faglega og fá sérfræðinga í lið með okkur í bland við Jón og Gunnu sem hafa gegnið í gegnum þessa reynslu,“ segir Kristborg Bóel. 

Finnst ykkur fólk vera að ganga í gegnum svipaða hluti þegar það skilur eða er hver skilnaður einstakur?

„Hver og einn skilnaður er vissulega einstakur en rannsóknir sýna að flestir ganga í gegnum svipað sorgarferli en þó á sínum hraða,“ segir Kristborg Bóel. 

„Vissulega er hver skilnaður einstakur en eftir mikla rannsóknarvinnu höfum við komist að því að sama hvernig skilnaður kemur til þá upplifa allir mikla og djúpa sorg. Sorg sem er erfitt að staðsetja, sérstaklega fyrir þá aðila sem óska eftir skilnaðnum. Þeir upplifa sig oft í órétti til að syrgja,“ segir Kolbrún Pálína. 

Hvað lærðuð þið af því að skilja sjálfar? 

„Að bera virðingu fyrir ferlinu, að játa vanmátt sinn, að njóta þroskans og fagna hverju skrefi í átt að hamingjunni á ný. Að óttast ekkert, að dæma engan, fylgja hjartanu og lifa fyrir sig,“ segir Kolbrún Pálína og Kristborg Bóel bætir við: 

„Það er mikið þroskaferli að skilja og ef maður tæklar það rétt kemur maður út úr því sem sterkari einstaklingur myndi ég halda. Það sem ég hef helst lært er að það er ekki hægt að flýta þessu ferli, það verður bara að fá að hafa sinn gang.“

Kristborg Bóel Steindórsdóttir.

Hvað hefðuð þið vilja vita áður en þið skilduð sjálfar?

„Að sama hvað maður hefur unnið mikið í sjálfum sér, lesið mikið eða telur sig vera tilbúinn þá er ekkert sem býr mann undir skilnað eða allt það sem honum fylgir,“ segir Kolbrún Pálína. 

„Ég hefði vilja vita hvað þetta er ógeðslega mikið fokk! Nei, en svona grínlaust þá reyndist mér þetta alveg ógeðslega erfitt. Skilnaður er skipsbrot og heimsmyndin verður öll önnur eftir og það er flókið að fóta sig í nýjum veruleika með kramið hjarta,“ segir Kristborg Bóel. 

Þegar þær eru spurðar að því hvað það taki langan tíma að jafna sig eftir skilnað segja þær það misjafnt. 

„Klisjan segir tvö ár. Það er ástæða fyrir því að ég segi klisja því það er jafn misjafnt og tilfellin eru mörg. Sumir jafna sig aldrei á meðan aðrir skilja með miklum sóma og ná að byggja upp nýtt og fallegt líf með nýjum einstaklingum,“ segir Kolbrún Pálína. 

„Það er algerlega einstaklingsbundið. Ég held samt að það sé algengara að það taki lengri tíma heldur en fólk gerði ráð fyrir. Talað hefur verið um tvö ár og ég er ekki frá því að það sé nærri lagi,“ segir Kristborg Bóel. 

• Blogga um frétt