Leikkonan María Ellingsen og ljósmyndarinn Christopher Lund gengu í hjónaband í Færeyjum um þarsíðustu helgi. Færeyjar eru í miklu uppáhaldi hjá bæði Chris, eins og hann er kallaður, og Maríu en hún á ættir að rekja þangað en mamma hennar Ásbjörg er frá Vági í Suðurey. Hún hefur því komið þangað síðan hún var barn, á mikið af ættingjum þar og talar færeysku reiprennandi. Chris hefur ferðast mikið um Færeyjar sem ljósmyndari og dvalið þar í fríum með Maríu. Það var í einni slíkri ferð sem hann bað hennar á bryggjunni í gamla bænum BÖ þar sem brúðkaupið var haldið.
Brúðkaup Maríu og Chis var ekkert venjulegt brúðkaup því það stóð yfir í þrjá daga að færeyskum sið. Flestir gestanna komu snemma til að fá tækifæri til að skoða þetta merkilega land. Færeyskir ættingjar voru meðal gesta en aðrir komu frá Íslandi, Noregi, Svíþjóð, Danmörku, Finnlandi, Austurríki og Ameríku. Þótt Færeyjar séu frekar þekkt fyrir þoku, rok og rigningu þá brá svo við að það var logn og sól flesta dagana.
Chris og María bjuggu í þorpinu allan tímann ásamt börnum sínum. Á föstudagseftirmiðdegi komu gestirnir í þorpið og brettu margir upp ermar við að undirbúa veisluna, reisa tjald og útbúa göngustíg niður í fjöru. Maja í Blómahönnun hafði yfirumsjón með skreytingum fyrir gömlu kirkjuna og að útbúa blómakransa en Dhvani mágkona Maríu ásamt fleirum sá um að þeir sem vildu frekar grænmetismat fengju eitthvað gómsætt. Æskuvinir Chris kveiktu varðeld þegar líða tók á kvöldið og grilluðu pylsur og gestir fengu tækifæri til að kynnast.
Svo var það brúðkaupsdagurinn sjálfur. Chris byrjaði daginn á að fara í sjósund á meðan Svavar Örn greiddi Maríu fyrir brúðkaupið. Kristín dóttir Maríu farðaði mömmu sína fyrir brúðkaupið.
„Þetta var rólegur morgun og enginn þurfti að fara neitt enda kirkjan öðru megin við húsið og veislusalurinn hinumegin,“ segir María þegar hún er spurð út í brúðkaupsdaginn.
Hún klæddist hvítri útgáfu af Færeyska þjóðbúningum úr ull og silki sem Rutt Hansen frá Fuglafirði útbjó ásamt Ester dóttur sinni sem er fjölskylduvinur frá því hún dvaldist hjá Maríu sem au-pair. Slörið var saumað hjá Eðalklæðum. Chris klæddist skoskum Walker–Slater ullarjakkafötum frá Kormáki og Skildi. En margir gestanna klæddust einmitt þjóðbúningum eða ullarfatnaði. En giftingahringana smíðaði Erling Jóhannsson gullsmiður og leikari.
„Tróndur hringjari bæjarins hringdi svo til messu klukkan fjögur og var hvert sæti í kirkjunni setið. Presturinn var Axel Njarðvík sem er vinur okkar í gegnum náttúruvernd.“
Athöfnin hófst á því að Kristín dóttir Maríu gekk inn kirkjugólfið og lék lagið, Blátt lítið blóm eitt er, á fiðlu. Magnea Árnadóttir tók svo undir á þverflautu og Ellen Freydís Martin söng. Auk þeirra söng færeyska kvennasveitin KATA og forsöngvari þeirra Gudrid Hansdóttir söng lag sitt Morgun í Mars en það var Eivör Pálsdóttir sem skipulagði tónlistina. Að vígslu lokinni héldu svaramenn þeirra, Hrefna Ólafsdóttir og Felix Gylfason, ræður sínar og svo leiddi KATA kirkjugesti út og niður á strönd þar sem harmonikkuleikari sat á steini í sólinni og spilaði vals undir fyrsta dansi brúðhjónanna.
Þá leiddi Jóni Jónsdóttir úr Gjörningaklúbbnum ástargjörning með yfirskriftinni Ástin sigrar allt og kórinn Gómagott sem var stofnaður sérstaklega af vinahópnum fyrir þetta tilefni söng „Hjá lygnri móðu““ eftir Halldór Laxness. Og þannig hófst veislan sem flæddi milli gamla Pakkhússins, Brúðarhússins, tjaldsins og bryggjunnar. Matinn framreiddi einn þekktasti matreiðslumaður Færeyja, Leifur Sörenssen sem stofnaði KOKS. Umsjón með veislunni höfðu Anne Sophie og Helga sem reka Pakkhúsið. Kökurnar voru heimabakaðar af frændfólki og vinum og undir miðnætti var fiskisúpa borin fram sem náttabiti. Svo var sungið og dansað fram á nótt.
Á sunnudeginum var gestum boðið í siglingu út í eyjuna Tindhólm sem blasir við frá BÖ og fáir hafa tækifæri til að heimsækja. Þar var farið í skoðunarferð undir tryggri leiðsögn heimamanna og síðan buðu ættmenni Maríu uppá færeyskan mat þurrkaða grind, spik og skerpikjöt og dansaður var Færeyskur dans.
„Það sem stendur uppúr eru þessir ógleymanlegu, fallegu og dýrmætu dagar þar sem við vorum umvafinn börnunum okkar, fjölskyldu og vinum sem komu alla þessa leið til að gleðjast með okkur og Færeyjarnar okkar sem skörtuðu sínu fegursta,“ segja hjónin María og Chris sæl og glöð.