Tónlistarkonan Madonna hefur aldrei verið feimin við að sýna bert hold. Í gær, mánudag, birti söngkonan fræga mynd af sér berbrjósta með hækju í öðrum handarkrikanum.
Við myndina skrifaði hún: „Allir eru með hækju.“
Heilsa hinnar 61 árs gömlu Madonnu hefur verið betri en á þessu ári en í mars síðastliðnum datt hún á rófubeinið á tónleikum. Stól var kippt undan henni fyrir misgáning og féll hún í gólfið.
„Ég komst í gegnum tónleikana, en samt bara rétt svo, af því ég vil ekki valda neinum vonbrigðum. Í dag hins vegar sé meira að segja ég að þessari dúkku er haldið saman með límbandi og lími, hún þarf að liggja í rúminu og hvíla sig í nokkra daga svo hún geti lokið tónleikaferðalaginu með bros á vör og andlitið í heilu lagi,“ sagði tónlistarkonan um slysið.
Heilsu sinnar vegna hefur Madonna þurft að aflýsa fjölda tónleika á tónleikaferðalaginu Madame X. Að lokum aflýsti hún svo afganginum af ferðalaginu vegna kórónuveirunnar.
Hún greindi frá því í apríl að hún hefði farið í skimun og út úr henni hefði komið að hún væri með mótefni gegn veirunni. Það má því draga þá ályktun að hún hafi smitast af veirunni, þótt hún hafi aldrei greint frá miklum veikindum.