Pétur Ívarsson, verslunarstjóri Hugo Boss Kringlunni, er með puttann á púlsinum þegar kemur að tískunni. Hann segir hvíta strigaskó vinsæla með sparifötunum í ár. 

Hvernig verða fermingarplönin?

„Fermingarplönin okkar eru eins og hjá öðrum upp í loft. Okkar strákur fermist 29. ágúst og verðum við með þrjár litlar veislur þann dag.“

Hverju mælirðu með fyrir fermingarpabbann?

„Ég mæli með að hann velji sér föt sem honum líður vel í og fermingarbarnið er sátt við. Þar komum við sterkir inn að aðstoða við valið.“

Hver er uppáhaldsilmurinn þinn?

„Sjálfur nota ég alla jafna ekki ilmi en besta lykt sem ég veit um er fersk útilykt af konunni minni þegar hún kemur heim eftir golf.“

Hvert er uppáhaldstískumerkið?

„Það er nokkuð augljóst að Boss er mitt uppáhaldsfatamerki.“

Hver er uppáhaldsflíkin þín?

„Uppáhaldsflíkin er grænn hettujakki frá Boss að sjálfsögðu. Ég er búinn að nota hann allt of lengi en fæ mig ekki til að hætta að nota hann.“

Hvernig er tískan hjá feðrum á fermingardaginn?

„Fermingartíska pabbanna er með svipuðu sniði og síðustu ár. Það eru annaðhvort jakkaföt eða samsett stakur jakki og buxur. Örlítið léttara en áður jafnvel þannig að pabbarnir eru í hvítum stirgaskóm eins og strákarnir.“

En hjá fermingardrengjunum?

„Við erum ekki mikið að selja fermingarstrákum, þó koma alltaf þónokkrir sem eru komnir lengra í líkamlegum þroska og versla hjá okkur. Það er það sama hjá þeim, annaðhvort jakkaföt eða samsett jakki og buxur. Annars sýnist mér hvítu strigaskórnir vera aðalsmerki ferminganna.“

Fékkstu eitthvað töff í fermingagjöf sem þú manst eftir?

„Ég fékk kassettutæki sem ég var mjög ánægður með.“

Hver er uppáhaldsmorgunmaturinn?

„Ég borða aldrei morgunmat og æfi alltaf á fastandi maga. Ég fæ mér þó alltaf tvo espresso áður þannig að svarið er væntanlega espresso.“

Áttu þér uppáhaldshótel?

„Uppáhaldshótelið mitt er hótel sem ég og Una vorum á síðast þegar við fórum til Parísar.“

Fylgir þú einhverjum á samfélagsmiðlum tengt tískunni?

„Ég er búinn að vera í þessum bransa svo lengi og hef unnið með mörgum. Margir fyrrverandi starfsmenn Boss hafa hætt og opnað eigin búðir og eru nokkuð duglegir á samfélgsmiðlum. Ég fylgist vel með þeim öllum.“

Hvað ætti ekki að gera tengt tískunni?

„Hneppa báðum tölunum á tveggjatölujakka.“

En alltaf?

„Hneppa efri tölunni á tveggjatölujakka.“

Eitthvað að lokum?

„Njótið þess að vera til og gangi ykkur vel með fermingarnar.“