Smartland Mörtu Maríu | Frægð | mbl | 27.10.2020 | 9:35 | Uppfært 12:02

Þurfti 3 lítra af vökva í æð

Róbert Marshall er gestur Sölva Tryggvasonar. Ljósmynd/Stjórnarráðið

Róbert Marshall er nýjasti gestur Sölva Tryggvasonar í podcasti Sölva. Róbert, sem er þrautreyndur blaðamaður og var á þingi, hefur á síðustu árum unnið við fjallamennsku, hlaup og útivist. Hann segir í þættinum sögu af því þegar hann þornaði upp í Jökulsárhlaupinu fyrir nokkrum árum.

„Ég kem í mark og er greinilega orðinn uppþornaður, þó að ég hafi verið að passa upp á að drekka vatn og taka gel alla leiðina, enda reyndur í þessu. Svo fæ ég mér kók og snickers og eitthvað, en jafna mig bara ekki og mér var bara áfram óglatt og ég var hvítur í framan og svo geri ég það sem maður á ekki að gera. Ég fer afsíðis. Það er þekkt viðbragð hjá fólki þegar því líður illa að reyna að koma sér út úr mannmergð. Ég lagðist upp í bíl og hallaði sætinu, en svo kemur að bílnum Hjálmar bæklunarlæknir sem var búinn að vera í hópnum að æfa með mér og sér mig og dregur mig bara inn í sjúkrabíl. Þar voru settar nálar í báðar hendurnar á mér og kreistir pokar og settur vökvi á kerfið þangað til mér átti að verða mál að pissa. En það líða alveg 3 lítrar þangað til ég er kominn með lit í andlitið. Þetta var greinilega svona rosalegt vökvatap og það var fullt af fólki að fá krampa í þessu hlaupi af því að hitinn var svo mikill.“

Róbert, sem starfar nú sem ráðgjafi forsætisráðherra, hefur sett sér það markmið að ná að fara á 100 hæstu tinda Íslands og segist búinn að fara á ríflega 40.

„Ég á mikið eftir, en það er ákveðinn hópur af fólki sem er á þessari sömu vegferð. Bjarni Ármanns er til dæmis að gera þetta mjög hratt. Hann er kominn með hálfgerða þráhyggju. Þorvaldur Þórsson, sem kortlagði þessa tinda og er svakalegur fjallamaður, hefur farið á alla þessa 100 tinda og líklega 2-3 einstaklingar í viðbót. En svo væri ég líka til í að hlaupa einhvern tíma 100 kílómetra hlaup og eiga það á ferilskránni.“

Róbert var yfirmaður yfir einu 24 klukkustunda fréttastöðinni sem hefur verið rekin í Íslandssögunni, NFS. Metnaðarfullt verkefni sem lifði ekki lengi, enda Ísland ekki fjölmennt land.

„Það sem klikkaði eiginlega við NFS var að það var bara ekkert að frétta! Ég var formaður Blaðamannafélagsins þegar Gunnar Smári nálgaðist mig með þetta verkefni og fyrir ungan mann var þetta gífurleg reynsla og skemmtilegt að hafa gert þetta. 700 milljónir og 120 manns sem ég var allt í einu kominn með ábyrgð á. Þetta var frábær skóli. Rosalega mikið af fólki sem er að vinna á fjölmiðlum landsins í dag byrjaði sín störf þarna. Tugir einstaklinga. Stöðin var búin til af fólki sem brann fyrir fjölmiðlum og það kom margt mjög gott út úr þessu. En við hefðum þurft allavega eitt eldgos eða eitt hrun til að ná þessu á næsta plan.“

Róbert hefur sem fyrr segir víða komið við á löngum og mögnuðum ferli. Hann vann um árabil sem fréttamaður og þáttastjórnandi, stofnaði svo Fréttastöðina NFS ásamt fleirum, áður en hann fór síðar í stjórnmál, þar sem hann sat á þingi. Í þættinum fara Róbert og Sölvi yfir alla þessa hluti og margt margt fleira.

Hægt er að hlusta á viðtalið í heild sinni á hlaðvarpsvef mbl.is og í spilaranum hér fyrir neðan.