Maxime Sauvageon flutti til Íslands fyrir tveimur árum og hefur síðan þá flutt inn franskar gæðavörur. Makkarónurnar sem hann býður upp á eru vinsælar á veisluborð. Hann er fæddur og uppalinn í Frakklandi og þótt hann kunni einstaklega vel við sig á Íslandi þá hefur hann haft ánægju af því að færa Íslendingum meira úrval þegar kemur að matvöru.
„Ég hef búið í Lyon og í París nær allt mitt líf, þar sem ég menntaði mig í viðskiptum. Ég á íslenska unnustu sem er ástæða þess að ég flutti til landsins. Þegar ég flutti til landsins stofnaði ég innflutningsfyrirtækið Kauptu betur, sem býður upp á gæðavörur á íslenskum markaði.“
Sauvageon segir Ísland einstaklega fallegt land og er ánægður með að búa hér. Hann hefur alltaf haft áhuga á mat enda úr mikilli matarfjölskyldu.
„Móðir mín er frábær kokkur og bróðir minn er kokkur. Ég ólst upp í Ardéche í Suður-Frakklandi þar sem ég var umkringdur ilmi af lavender, karamellu og sætum möndlum sem móðir mín notaði í baksturinn. Ég starfaði í átta ár fyrir matvælafyrirtæki í Frakklandi áður en ég flutti til Íslands, svo matur er mér ofarlega í huga. Góður vinur minn er bakari í Frakklandi og ákvað ég að flytja makkarónurnar hans til landsins þegar ég flutti hingað. Þær eru seldar í Mosfellsbakaríi og í Hagkaupum og svo er hægt að panta þær fyrir veislur í mínu fyrirtæki.“
Sauvageon segir Íslendinga duglega að panta stóra skammta af makkarónum fyrir veislur sínar.
„Við lánum kökupíramída sem hægt er að setja makkarónur á. Við bjóðum upp á 25 bragðtegundir og liti af makkarónum, sem gera einstaklega mikið fyrir veisluborðið. Það er hægt að velja á milli þess að hafa 60 makkarónur, 112 og 220 á píramídanum.“
Aðspurður um franskar hefðir þegar kemur að fermingarveislum þá segir hann vatnsdeigsbolluturna vinsæla, makkarónur og Dragée; sykraðar litríkar möndlur, ómissandi á veisluborðið.“
Hann segir að makkarónur færi lit og fegurð á veisluborðið og annaðhvort sé hægt að velja makkarónur í uppáhaldslit fermingarbarnsins, eða velja makkarónur sem eru bragðtegund sem barnið kann að meta.
Hann mælir með að hafðar séu makkarónur sem aðaleftirréttur í veislum eða til hliðar við aðrar kökur eða jafnvel makkarónur á kökur til skrauts.
„Ástæðan fyrir því að ég elska makkarónur er vegna þess að þær eru fallegar, eilítið stökkar og svo bráðna þær í munni.“