Á tímum sem þessum þar sem um 50% af hjónaböndum sem stofnað er til enda með skilnaði þykir það gott þegar fólk nær að viðhalda ástinni. Smartland tók saman lista af nokkrum hjónaböndum sem hafa enst vel og lengi.
Esther Talia Casey og Ólafur Egill Egilsson eru búin að vera saman í meira en 20 ár. Þau búa ekki bara saman heldur vinna oft saman í gegnum listina. Hún leikur eitt af hlutverkunum í söngleiknum Níu líf sem fjallar um ævi og störf Bubba Morthens sem hann leikstýrir.
Benedikt Jóhannesson og Vigdís Jónsdóttir eru búin að vera saman lengi. Hann var fjármála- og efnahagsráðherra 2017 en Vigdís er sérfræðingur á skrifstofu Alþingis.
Ögmundur Jónasson og Valgerður Andrésdóttir hafa staðið þétt saman síðan elstu menn muna. Hann var ráðherra og var lengi formaður BSRB. Hún er hinsvegar erfðafræðingur. Í janúar kom Rauði þráðurinn út en þar fer hann yfir menn og málefni eins og honum einum er lagið.
Hjónin Tolli Morthens og Gunný Magnúsdóttir eru búin að vera lengi saman. Hann er einn af þekktustu myndlistarmönnum þjóðarinnar en honum hefur líka verið annt um að fólk hætti að drekka og dópa. Gunný er með meistaragráðu í fíknifræðum frá Hazelden Betty Ford Graduate School of Addiction Studies í Minnesota. Hún er líka formaður stjórnar Batahúss þar sem þau hjónin vinna saman.
Leikarahjónin Nína Dögg Filippusdóttir og Gísli Örn Garðarsson er búin að vera saman síðan þau voru unglingar. Í dag vinna þau saman í fjölmörgum verkefnum bæði í gegnum Vesturport og fleira. Þau gerðu til dæmis Verðbúðina saman en nú er hann að leikstýra Exit 3 í Noregi.
Katrín Jakobsdóttir og Gunnar Sigvaldason hnutu um hvort annað fyrir um 20 árum. Hann er maðurinn á bak við konuna og vill helst ekki sjást á myndum. Það er þó ekki hægt að segja að hann hafi ekki áhuga á starfi eiginkonu sinnar því sjálfur er hann með doktorspróf í stjórnmálafræði.
Íris Róbertsdóttir og Eysteinn Gunnarsson eru búin að vera lengi saman. Hún er bæjarstjóri í Vestmannaeyjum en hann er matreiðslumaður og starfar sem kokkur um borð í Huginn VE.
Þórólfur Guðnason og Sara Hafsteinsdóttir hafa verið gift í háa herrans tíð. Þórólfur er flestum kunnur fyrir þrekvirki sem hann vann sem sóttvarnarlæknir í heimsfaraldrinum. Heilbrigðisgeirinn er hjónunum Þórólfi og Söru hugleikinn því hún starfar sem yfirsjúkraþjálfari á Landspítalanum.
Ragnheiður Elín Árnadóttir, framkvæmdastjóri Þróunarmiðstöðvar OECD og eiginmaður hennar, Guðjón Ingi Guðjónsson, sölustjóri hjá Martak, fögnuðu postulínsbrúðkaupi árið 2020 og eiga því 22 ára brúðkaupsafmæli í ár. Þau hafa verið svo lengi saman að það man enginn eftir þeim öðruvísi en par.
Ástin bankaði snemma upp á hjá þeim Degi B. Eggertssyni, borgarstjóra og Örnu Dögg Einarsdóttur, yfirlækni á líknardeild Landspítalans. Þau hafa verið gift í 21 ár og hafa aldrei verið hamingjusamari.
Lilja Hrönn Hauksdóttir, sem alltaf er kennd við tískuvöruverslunina Cosmo, gekk að eiga eiginmann sinn, Frey Jakobsson, árið 1997. Hjónin munu því eiga 25 ára brúðkaupsafmæli á árinu og eru „still going strong“.
Víðir Reynisson varð landsþekktur í heimsfaraldrinum en hann er yfirlögregluþjónn hjá Almannavörnum Ríkislögreglustjóra. Fyrir 30 árum létu Víðir og Sigrún María Kristjánsdóttir, eiginkona hans, pússa sig saman í Háteigskirkju í Reykjavík. Héldu þau því upp á perlubrúðkaupsafmæli með pompi og prakt í síðastliðnum júnímánuði.
Bogi Ágústsson, fréttamaður hjá RÚV, og Jónína María Kristjánsdóttir, kennari, hafa verið saman í marga áratugi. Þau eru sögð einstaklega samrýmd hjón og munu áreiðanlega eiga góðar stundir saman þegar Bogi lýkur starfsferlinum sem eitt þekktasta andlit íslensku sjónvarpssögunnar.
Einkaþjálfarinn, dansarinn og sjónvarpskokkurinn, Yesmine Olsson og Arngrímur Fannar Haraldsson, tónlistarmaður og viðskiptastjóri í Hörpu, fóru að stingja saman nefjum fyrir síðustu aldamót. Yesmine er fædd á Sri Lanka en uppalin í Svíþjóð en þau Addi Fannar kynnast þegar hún kom til Íslands á árum áður eftir að hafa fengið hér starf sem einkaþjálfari. Hún fylgdi Adda í gegnum ævintýri hljómsveitarinnar Skítamórals og síðan hafa þau stutt við bak hvors annars í hinum ýmsu verkefnum lífsins.