Smartland Mörtu Maríu | Frægð | mbl | 18.8.2022 | 19:00

Herra hnetusmjör með tvöföld laun Emmsjé Gauta

Herra hnetusmjör var með tvöfalt hærri tekjur en Emmsjé Gauti á síðasta ári. Samsett mynd

Tónlistarmaðurinn Herra hnetusmjör var með 894 þúsund krónur í mánaðartekjur að meðaltali á síðasta ári. Tekjur hans eru tvöfalt hærri en tekjur tónlistarmannsins Gauta Þeys Mássonar sem er betur þekktur sem Emmsjé Gauti.

Gauti var með 429 þúsund krónur í tekjur á síðasta ári að því er fram kemur í Tekjublaðið Frjálsrar verslunar.

Herra hnetusmjör gaf út plötuna Flottur skrákur 2 á síðasta ári. Þar að auki rekur hann nikótínvöruverslunina Vörina í Kópavogi og skemmtistaðinn 203 í miðborg Reykjavíkur. Á þessu ári hafa þeir Gauti gefið út saman lagið Hálfa milljón.

Gauti gaf út plötuna Mold á síðasta ári ásamt tónlistarmanninum Helga Sæmundi Guðmundssyni. Helgi Sæmundur er í hljómsveitinni Úlfur úlfur en hann var með 332 þúsund krónur í tekjur á síðasta ári.

Rapparinn Arnar Freyr Frostason, annar liðsmanna rappsveitarinnar Úlfur Úlfur, var með 548 þúsund krónur í tekjur á mánuði á síðasta ári.

Litli bróðir tekjuhærri

Bræðurnir Friðrik Dór og Jón Jónssynir voru báðir með tæplega hálfa milljón króna í tekjur á síðasta ári. Friðrik Dór var með örlítið hærri tekjur eða 484 þúsund krónur en Jón var með 478 þúsund krónur.

Friðrik Dór og Jón Jónssynir. mbl.is/Ásdís Ásgeirsdóttir

Guðrún Ýr Eyfjörð, betur þekkt undir listamannsnafninu GDRN, var með 350 þúsund krónur í tekjur á síðasta ári miðað við greitt útsvar. Á síðasta ári lék hún í Netflix-þáttaröðinni Katla.

Tónlistarkonan Bríet Ísis Eldar var með öllu lægri tekjur eða 226 þúsund krónur á mánuði.

Svala Björgvinsdóttir söngkona var með 199 þúsund krónur á mánuði á síðasta ári.

Athygli vekur að tónlistarmaðurinn Aron Can Gultekin var aðeins með skráðar tekjur upp á 101 þúsund krónur á mánuði að meðaltali. Hagur Arons gæti þó vænkast á þessu ári en hann opnaði nýverið veitingastaðinn Stund í mathöllinni Veru í Grósku, ásamt kærustu sinni Ernu Maríu Björnsdóttur, leikaranum Aroni Má Ólafssyni og sambýliskonu hans, Hildi Skúladóttur.