Sigríður Dögg Arnardóttir, betur þekkt sem Sigga Dögg kynfræðingur, tekur nú á móti myndum af typpum til að birta inni á vefsíðu sinni. Fyrr í vetur opnaði Sigga fyrir innsendingar á píkumyndum og hefur síðan þá birt eina mynd af píku á dag á vef sínum.
Sigga greindi frá því að nú tæki hún líka við typpamyndum og virðist hafa fengið margar fyrirspurnir hvort bara mætti senda inn píkumyndir. Typpamyndirnar munu þó ekki birtast á netinu fyrr en eftir áramót heldur munu píkur eiga sviðið út árið.
Sigga, sem er eigandi Betra kynlífs, hefur frætt þjóðina um hinar ýmsu hliðar kynlífs undanfarin ár og sinnt kynfræðslu. Myndirnar verða notaðar til fræðslu og birtast nafnlaust á vef hennar.
Þau sem vilja senda inn typpamynd þurfa að tilgreina hvers vegna myndin er send inn og í hvaða sambandi viðkomandi á við kynfæri sín.
Áhugasöm geta sent Siggu myndir á Instagram eða í tölvupósti á sigga@siggadogg.is.