Bandaríska sjónvarpskonan og leikkonan Ricki Lake er sátt í eigin skinni og kaus að fagna líkama sínum og nýfengnu andlegu frelsi með nektarmynd sem hún deildi með fylgjendum sínum á Instagram. Leikkonan, sem er hvað þekktust fyrir leik sinn sem Tracy Turnblad í upprunalegu Hairspray-kvikmyndinni frá árinu 1988, sést skælbrosandi ofan í útibaðkari og virðist í algjörri alsælu.
„Þessir dagar eru þeir allra bestu í lífi mínu,“ skrifaði Lake við myndina. „54 og ½ árs gömul. Þakklát fyrir allt sem þurfti að gerast til þess að ég næði hingað á þennan stað, stað sjálfsástar og samþykkis.“
Leikkonan fékk mikið lof frá frægum vinum sínum í kjölfar myndbirtingarinnar. Fyrrverandi spjallþáttastjórnandinn Rosie O'Donnell skrifaði: „Ég get ekki útskýrt í orðum hversu mikið ég dýrka þig.“ Og Rachel Harris, sem er þekkt fyrir leik sinn í þáttunum Lucifer, skrifaði: „Þú verður bara betri og betri kona.“