„Það er allt í lagi að vera púkó“

Mæðgurnar Heiðdís Chadwick Hlynsdóttir 20 ára og Hafdís Óskarsdóttir 50 ára eru sannkallaðar tískumæðgur.

Heiðdís útskrifaðist úr Menntaskólanum við Hamrahlíð síðasta vor og er þessa dagana að vinna sem sundlaugavörður í Lágafellslaug, Mosfellsbæ, en hún er að safna peningum til þess að geta lært leiklist erlendis. Móðir hennar Hafdís er einnig gamall MH-ingur og er höfuðbeina- og spjaldhrygg-jafnari en starfar sem hundaeftirlitsmaður Mosfellsbæjar.

Hafið þið mæðgur líkan smekk?

Heiðdís: „Stundum, þá samt oftast þegar við erum í hversdagsklæðunum okkar. Við eigum það báðar til að klæðast fötum í náttúrulegum litum og í rokkaraskónum okkar.“

Hafdís: „Já, nokkuð oft.“

Gangið þið í fötum hvor af annarri?

Heiðdís: „Það hefur komið fyrir. Það leynist svo margt flott og klassískt í fataskápnum hennar mömmu.

Hafdís: „Já, frekar Heiðdís af mér.“

Kemur ekki fyrir að önnur tímir ekki að lána hinni eitthvað?

Hafdís: „Það hefur aldrei gerst... er það?“

Heiðrún: „Jú algjörlega, það hefur komið fyrir. Eins og þegar ég er nýbúin að kaupa mér eitthvað. Eins og þegar ég keypti mér flottu brúnu hestaskóna úr Timberland og mamma mátaði þá. Þá sagði ég ítrekað við hana að hún mætti sko EKKI nota þá. En svo kom það fyrir að þegar ég ætlaði að fara í þá þá fann ég þá hvergi því hún var víst í þeim.“

Berið þið fatakaupin hvor undir aðra áður en þau eiga sér stað?

Hafdís: „Já, mjög oft.“

Heiðdís: „Stundum skoða ég föt sem ég veit að mömmu myndi ekki finnast flott og þá hætti ég yfirleitt við að kaupa flíkina. Hins vegar ef ég finn eitthvað sem ég veit að mamma fílar þá ber ég flíkina undir hana.“

Notið þið sama skónúmer?

Heiðdís: „Já! Er reyndar með aðeins stærri fót, en ég meina...“

Hafdís: „Já stærð 38-39.“

Skiptist þið á skóm?

Heiðdís: „Já, stundum.“

Hafdís: „Já, það kemur fyrir.“

Kemur fyrir að önnur ykkar hefur sterkar skoðanir á því að eitthvað fari hinni ekki vel?

Hafdís: „Nei.“

Heiðdís: „Nei, eiginlega ekki.“

Kemur fyrir að annarri ykkar finnst hin svo púkó að hún vilji ekki fara með henni út?

Heiðdís: „Ekki hjá mér! Þrátt fyrir að mamma væri púkó þá myndi ég bara leyfa henni það. Hún er það ekki. það er gott. Hún getur verið mjög smart.

Hafdís: „Aldrei! Okkur finnst allt í lagi að vera púkó. Ef mér finnst ég rosalega groddaleg til fara þá finnst Heiðdísi það bara töff.“