Mikið í sömu fötunum

Ríka og fræga fólkið passar mjög vel upp á að mæta nánast aldrei opinberlega í sama klæðnaðinum tvisvar en eitthvað hefur kanslari Þýskalands, Angela Merkel, farið á mis við þau tískuráð.

Merkel hefur margoft sést í sama klæðnaði á hinum og þessum viðburðum, hvort sem það eru hátíðir, óperur eða aðrir opinberir viðburðir. Á þeim viðburðum hafa að sjálfsögðu verið ljósmyndarar sem hafa fest þessi tískumistök kanslarans á filmu og deilt með heiminum.

Um er að ræða marglita túrkisbláa túniku, en hún hefur klæðst henni reglulega opinberlega síðustu átján árin.

Nú síðast sást hún í flíkinni á Salzburg-hátíðinni sem fram fór í vikunni en danska vefsíðan Bild birti grein þess efnis að hún hefði sést í þeirri sömu túniku árið 2009 á sömu hátíð. Árin 2002 og 1996 mætti hún einnig í flíkinni góðu á aðra hátíð, Wagner-hátíðina í Bayreuth.

Árin 2008 og 2012 mætti Merkel svo í sama dökkbláa galakjólnum á Bayreuth-hátíðina en árið 2012 náðust myndir af henni í galakjólnum þar sem sást glitta í stutta sokka undan kjólnum þegar vindur lék um kjólinn. Flestar konur hefðu líklega verið í nælonsokkabuxum við sama tilefni.

Árin 2013 og 2014 mætti hún einnig í sömu bláu dragtinni á Bayreuth-hátíðina. HÉR má sjá fleiri myndir af klæðnaði kanslarans.